మొదలే పెట్టలేదు.. రిలీజ్ డేట్ సెట్

నందమూరి కళ్యాణ్ రామ్ హీరోగా పూరి జగన్నాధ్ దర్శకత్వంలో ఓ మూవీ ఫిక్స్ అయిన విషయం తెలిసిందే. ఎన్టీఆర్ ఆర్ట్స్ బ్యానర్ పై ఈ చిత్రాన్ని స్వయంగా నిర్మించనున్నాడు కళ్యాణ్ రామ్. ఇప్పటికే పూరీ చెప్పిన స్టోరీకి హీరో ఓకే చెప్పేయగా.. స్క్రిప్ట్ పనులు చకచకా జరుగుతున్నాయి. ఈ చిత్రాన్ని మే నెల నుంచి స్టార్ట్ చేయాలని నిర్ణయించారు.

కళ్యాణ్ రామ్ సరసన హీరోయిన్ ని ఫైనలైజ్ చేసే పనిలో పడ్డాడు పూరీ. కృష్ణగాడి వీర ప్రేమగాధతో ఆకట్టుకున్న మెహ్రీన్ పీర్జాడా కౌర్ ని దాదాపుగా ఫైనల్ చేశారని తెలుస్తోంది. కళ్యాణ్ రామ్-మెహ్రీన్ ల జంట బాగుంటుందని పూరీ ఫీలవుతున్నాడట. ఇప్పటికే ఆమెకూడా ఓకే చేసేసిందని.. డేట్స్ సెట్ చేసుకుని అగ్రిమెంట్ చేసుకోవడమే లేట్ అని తెలుస్తోంది. ఈ మూవీని మే నెలలో స్టార్ట్ చేసి శరవేగంగా షూటింగ్ పూర్తి చేసి దసరానాటికి విడుదల చేయాలని పూరీ నిర్ణయించాడు.

కళ్యాణ్ రామ్ మూవీకి రీమిక్స్ అనే టైటిల్ సెట్ చేస్తారనే వార్తలువచ్చాయి. అయితే తామింకా ఏ టైటిల్ ని అనుకోలేదని, రీమిక్స్ మాత్రం ఖచ్చితంగా కాదని చెప్పిన యూనిట్.. తెలుగులోనే టైటిల్ ఉంటుందని హిట్ ఇచ్చారు. ఏమైనా పూరీ స్టైలే వేరు.. ఇంకా ముహూర్తం షాట్ కూడా తీయకుండానే.. రిలీజ్ ని ఫైనల్ చేసేస్తూ కొత్త ట్రెండ్ సృష్టిస్తున్నట్లున్నాడు పూరీ జగన్నాధ్.