మరో మెగా హీరోతో మరో నందమూరి హీరో

మల్టీస్టారర్ కథలకు ప్రస్తుతం మన హీరోలు ప్రాణం పోస్తున్నారనే చెప్పాలి. కొత్తగా చేయాలనే తపనతో ఇద్దరు కథానాయకులు ఉన్న కథ చేస్తే ఎలా ఉంటుంది అనే ఆలోచన అందరికి వస్తోంది. ఇక మన కుర్ర దర్శకులు కూడా ఇష్టమైన హీరోలను ఒకే తెరపై చూపించడానికి చాలా ఇంట్రెస్ట్ చూపుతున్నారు. గతంలో ఎప్పుడు లేని విధంగా ఇప్పుడు వరుసగా మల్టీస్టారర్ కథలు తెరపైకి వస్తున్నాయి. అసలు విషయంలోకి వస్తే.. నందమూరి వారసుడు కళ్యాణ్ రామ్ కూడా మరో మెగా హీరోతో స్క్రీన్ షేర్ చేసుకొనున్నా డట.

ఇప్పటికే రాజమౌళి దర్శకత్వంలో జూనియర్ ఎన్టీఆర్ - మెగా పవర్ స్టార్ రామ్ చరణ్ కాంబినేషన్ సెట్ అయిన సంగతి తెలిసిందే. ఇక కళ్యాణ్ రామ్ కూడా మరో మెగా హీరోతో నటించడానికి గ్రీన్ సిగ్నల్ ఇచ్చినట్లు తెలుస్తోంది. రిజల్ట్ తో సంబంధం లేకుండా వరుసగా సినిమాలు చేస్తున్న సాయి ధరమ్ తేజ్ - కళ్యాణ్ రామ్ కాంబినేషన్ లో ఒక మంచి సినిమా రానుందని ఫిల్మ్ నగర్ లో టాక్ వైరల్ అయ్యింది. రీసెంట్ గా కళ్యాణ్ రామ్ పవన్ సాధినేని అనే యువ దర్శకుడు చెప్పిన కథకు గ్రీన్ సిగ్నల్ ఇచ్చాడు. ఇంతకుముందు ఈ దర్శకుడు ప్రేమ ఇష్క్ కాదల్ అనే సినిమా చేశాడు.

నారా రోహిత్ తో సావిత్రి అనే సినిమా చేసి విమర్శకుల ప్రశంసలు అందుకున్నాడు. ఇక పవన్ చెప్పిన లేటెస్ట్ కథ కళ్యాణ్ రామ్ కు తెగ నచ్చేసిందట. మరో హీరోకి కూడా కథలో ప్రాధాన్యం ఉండడంతో సాయి ధరమ్ తేజ్ ని అనుకున్నట్లు సమాచారం. ఇక హీరోయిన్స్ గా రాశి ఖన్నా - అను ఇమ్మన్యుయేల్ ని అనుకుంటున్నారట. ఈ కాంబినేషన్ ఒకే అయితే దాదాపు మెగా ఫ్యామిలీ అండ్ నందమూరి ఫ్యామిలీ అంతా కలిసిపోయారు అని సోషల్ మీడియాలో స్పెషల్ పోస్టర్స్ కనిపిస్తాయి అని చెప్పవచ్చు. చూడాలి మరి ఈ ఇద్దరు హీరోలు ఎప్పుడు తెరపైకి వస్తారో..