తారకరత్నకు కళ్యాణ్ రామ్ బర్త్ డే విష్

కలసి ఉంటే కలదు సుఖం అనే మంచి సినిమా తీశారు నందమూరి తారక రామారావు. కానీ ఆయన కుటుంబ సభ్యులు మాత్రం ఎడమొహం పెడమొహం అన్నట్లుంటారు. సినిమాల్లో ఉన్న మిగతా ఫ్యామిలీల్లో ఆయా హీరోల మధ్య మంచి సంబంధాలున్నాయి కానీ.. నందమూరి కుటుంబ కథానాయకుల్లో మాత్రం యూనిటీ లేదు. బాలయ్యకు, ఎన్టీఆర్‌ కు మధ్య ఉన్న దూరం గురించి ఇప్పుడు కొత్తగా చెప్పాల్సిన పని లేదు. ఇక తారకరత్నతో అయితే ఎవరికీ సంబంధాల్లేవు. అతను నందమూరి హీరో అన్న సంగతే అందరూ మరిచిపోయారు. అభిమానులు కూడా అతణ్ని దూరం పెట్టేశారు.

ఇలాంటి సమయంలో కళ్యాణ్ రామ్ తన తమ్ముడికి పుట్టిన రోజు శుభాకాంక్షలు చెప్పడం విశేషం. ఈ రోజు ట్విట్టర్లో తారకరత్నకు బర్త్ డే విష్ చెప్పాడు కళ్యాణ్ రామ్. తన సినిమా ‘విజయీభవ’ ఆడియో ఫంక్షన్‌ కు వచ్చిన తారకరత్న తనకు షేక్ హ్యాండ్ ఇస్తున్న ఫొటో పెట్టి విష్ చేశాడతను. ఈ ఫొటోలో నందమూరి రామకృష్ణ కూడా కనిపిస్తున్నారు. హీరోగా ఒకేసారి తొమ్మది సినిమాలకు శ్రీకారం చుట్టిన తారకరత్న ఆ తర్వాత ఏ స్థితికి చేరుకున్నాడో తెలిసిందే. అతను పూర్తి చేసిన సినిమాలు విడుదలకే నోచుకోని పరిస్థితి. ఇలాంటి టైంలో నారా రోహిత్ సినిమా ‘రాజా చెయ్యి వేస్తే’లో విలన్ పాత్రతో తన కెరీర్ ను సరికొత్తగా నిర్మించుకునే ప్రయత్నంలో ఉన్నాడు తారకరత్న. పుట్టిన రోజు నాడు ఆ సినిమాలో అతడి లుక్ కూడా బయటికి వచ్చింది. దానికి మంచి రెస్పాన్స్ వచ్చింది. ఈ సినిమాతోనైనా తారకరత్న కెరీర్ మలుపు తిరగాలని ఆశిద్దాం.