క‌ళ్యాణ్ రామ్ దూకుడు పెంచిన‌ట్టేనా?

నిర్మాత‌.. న‌టుడు క‌ళ్యాణ్ రామ్ లో ప్ర‌యోగాత్మ‌క‌త గురించి తెలిసిందే. `ఓం -3డి` లాంటి భారీ బ‌డ్జెట్ చిత్రాన్ని నిర్మించి అందులో ప్ర‌యోగాత్మ‌క పాత్ర‌లో క‌నిపించారు. అలాగే సోద‌రుడు ఎన్టీఆర్ హీరోగా `జైల‌వ‌కుశ` లాంటి విభిన్న‌మైన‌ చిత్రాన్ని నిర్మించారు. ఇటీవ‌లే 118 లాంటి న‌వ్య‌పంథా సినిమాతో న‌టుడిగా మెప్పించాడు. క‌మ‌ర్షియ‌ల్ స‌క్సెస్ అనే కోణంలోనే కాకుండా వైవిధ్యం కోసం పాకులాడే హీరోగా క‌ళ్యాణ్ రామ్ పేరు పాపుల‌రైంది. అందుకే అత‌డు న‌టిస్తున్న తాజా సినిమాల‌పై అభిమానుల్లో ఆస‌క్తి నెల‌కొంది.

క‌ళ్యాణ్ రామ్ వ‌రుస‌గా రెండు సినిమాల్లో న‌టిస్తున్నారు. నేడు బ‌ర్త్ డే సంద్భంగా ఈ సినిమాల‌కు సంబంధించిన వివ‌రాలు వెల్ల‌డ‌య్యాయి. తాజాగా క‌ళ్యాణ్ రామ్ న‌టిస్తున్న 17వ సినిమా టైటిల్ ని యూనిట్ వ‌ర్గాలు ప్ర‌క‌టించాయి. `ఎంత మంచి వాడ‌వురా` అనేది ఈ సినిమా టైటిల్. ఈ చిత్రానికి `శ‌త‌మానం భ‌వ‌తి` ఫేం స‌తీష్ వేగేష్న ద‌ర్శ‌క‌త్వం వ‌హిస్తున్నారు. బాల‌కృష్ణ‌తో `ఆదిత్య 369` లాంటి క్లాసిక్ ని నిర్మించిన‌ శివ‌లెంక కృష్ణ ప్ర‌సాద్ ఈ చిత్రాన్ని నిర్మిస్తున్నారు. మెహ్రీన్ ఈ చిత్రంలో క‌థానాయిక‌. గోపిసుంద‌ర్ సంగీతం అందిస్తున్నారు.

ఈ సినిమాతో పాటు ‍మల్లిడి వేణు దర్శకుడిగా కల్యాణ్ రామ్‌ సొంత నిర్మాణ సంస్థ ఎన్టీఆర్ట్స్‌ బ్యానర్‌పై తెర‌కెక్క‌నున్న సినిమాకి రావ‌ణ టైటిల్ ని ఫైన‌ల్ చేశార‌ని ఇటీవ‌ల వార్త‌లొచ్చాయి. తొలుత ఈ సినిమాకు తుగ్లక్‌ అనే టైటిల్‌ను పరిశీలించినా ఫైనల్‌గా రావణ అయితే బావుంటుందని భావిస్తున్నార‌ని ప్ర‌చార‌మైంది. 118 లాంటి ప్ర‌యోగం త‌ర్వాత క‌ళ్యాణ్ రామ్ క‌థ‌ల విష‌యంలో కాస్తంత వెరైటీగానే ఆలోచిస్తున్నార‌ని అత‌డి ఎంపిక‌లు చెబుతున్నాయి. అలాగే సొంత బ్యాన‌ర్ లో ప‌లు వెబ్ సిరీస్ లు నిర్మించేందుకు క‌ళ్యాణ్ రామ్ స‌న్నాహాలు చేస్తున్న సంగ‌తి తెలిసిందే. నేడు క‌ళ్యాణ్ రామ్ బ‌ర్త్ డే సంద‌ర్భంగా అభిమానులు స‌హా ప‌రిశ్ర‌మ వ‌ర్గాల నుంచి శుభాకాంక్ష‌లు వెల్లువెత్తాయి.