'మా' అధ్యక్ష పదవికి పోటీ చేయడం గురించి నందమూరి హీరో ఏమన్నాడంటే..!

తెలుగు చిత్ర పరిశ్రమలో ఈసారి మూవీ ఆర్టిస్ట్‌ అసోసియేషన్‌ (మా) ఎన్నికలు రసవత్తరంగా మారే అవకాశాలు కనిపిస్తున్నాయి. ఇప్పటికే అధ్యక్ష పదవి కోసం ప్రకాష్ రాజ్ - మంచు విష్ణు - జీవితా రాజశేఖర్ - హేమ పోటీ పడనున్నట్లు ప్రకటించారు. దీంతో 'మా' లో చతుర్ముఖ పోటీ నెలకొందని అందరూ అనుకుంటుండగా.. ఇప్పుడు నందమూరి కల్యాణ్‌ రామ్‌ పేరు తెరపైకి వచ్చింది.

సెప్టెంబర్‌ లో జరగనున్న 'మా' అధ్యక్ష ఎన్నికల్లో హీరో కళ్యాణ్ రామ్‌ కూడా పోటీ చేయనున్నట్లు ఈరోజు ఉదయం నుంచి సోషల్ మీడియాలో రూమర్స్ చక్కర్లు కొడుతున్నాయి. ఈ నేపథ్యంలో కల్యాణ్‌ రామ్ టీమ్‌ స్పందిస్తూ రూమర్స్ కు చెక్ పెట్టింది. నందమూరి హీరో మూవీ ఆర్టిస్ట్స్ అసోసియేషన్‌ ఎలక్షన్స్ లో పోటీ చేయడం లేదని.. అవన్నీ ఊహాగానాలే అని అధికారికంగా ప్రకటించారు. మరి ప్రస్తుతం అధ్యక్ష పదవి కోసం బరిలో దిగిన నలుగురిలో నందమూరి ఫ్యామిలీ మద్దతు ఎవరికి ఉంటుందో చూడాలి.

ఇక సినిమాల విషయానికొస్తే.. కల్యాణ్ రామ్ ప్రస్తుతం తన స్వీయ నిర్మాణంలో ''బింబిసార'' అనే చారిత్రక నేపథ్యమున్న సోషియో ఫాంటసీ సినిమా చేస్తున్నాడు. కొత్త దర్శకుడు వశిష్ఠ్ ఈ చిత్రాన్ని తెరకెక్కిస్తున్నాడు. ఇటీవల విడుదలైన టైటిల్‌ లుక్‌ - మోషన్‌ పోస్టర్ విశేష స్పందన తెచ్చుకున్నాయి. అలానే నందమూరి తారకరామారావు ఆర్ట్స్ సమర్పణలో ఎన్టీఆర్ - కొరటాల శివ కాంబినేషన్ లో రూపొందే పాన్ ఇండియా ప్రాజెక్ట్ కి కళ్యాణ్ రామ్ ఒక నిర్మాతగా వ్యవహరిస్తున్నారు.