కమల్ ఇలా అయిపోయాడేంటి?

సినిమా సినిమాకు అవతారం మార్చేయడం కమల్ హాసన్ కు అలవాటు. ఒక సినిమాలో కనిపించినట్లు ఇంకో సినిమాలో కనిపించరు ఆయన. కమల్ గత నాలుగు సినిమాలే తీసుకోండి. విశ్వరూపం - ఉత్తమ విలన్ - పాపనాశం - చీకటి రాజ్యం.. ఈ నాలుగు సినిమాల్లోనూ లుక్ విషయంలో వైవిధ్యం చూపించారు కమల్. ఇప్పుడిక తన కొత్త సినిమాకు మళ్లీ లుక్ మార్చేశారు.

‘చీకటి రాజ్యం’లో గడ్డంతో కనిపించిన ఆయన ఈసారి గడ్డం, మీసం అన్నీ తీసేశాడు. జుట్టు కూడా బాగా తగ్గించేసి ముందుకు దువ్వారు. కొంత కాలం కిందటి వరకు ‘క్షత్రియ పుత్రుడు’ తరహాలో మీసం పెంచి వెరైటీగా కనిపించిన కమల్.. ఇప్పుడిలా కొత్త లుక్ లోకి మారిపోయి షాకిస్తున్నాడు. ఇళయరాజా తర్వాతి సినిమా ప్రమోషన్ కార్యక్రమంలో పాల్గొన్నపుడు కమల్ కొత్త లుక్ బయటపడింది.

తన మిత్రుడు, ప్రముఖ మలయాళ దర్శకుడు రాజీవ్ కుమార్ దర్శకత్వంలో కమల్ తమిళ, తెలుగు బైలింగ్వల్ ఫిలిం చేస్తున్న సంగతి తెలిసిందే. ఇందులో అమల ఓ ముఖ్య పాత్ర పోషిస్తోంది. ఈ సినిమా షూటింగ్ అంతా కూడా అమెరికాలోనే జరగనుంది. ఇది ఓ కాన్సెప్ట్ బేస్డ్ మూవీ అని.. చాలా కొత్తగా ఉంటుందని కమల్ చెబుతున్నాడు. ‘చీకటి రాజ్యం’ తరహాలోనే మూడు నాలుగు నెలల్లో సినిమా పూర్తి చేసి ఈ ఏడాది వేసవిలోనే ఈ చిత్రాన్ని ప్రేక్షకుల ముందుకు తేనున్నాడు కమల్.