దుమ్ముదులుపుతున్న కమల్ హాసన్

కమల్ హాసన్ ను దర్శకుడిగా, కథానాయకుడిగా నిలబెట్టిన సినిమా ‘విశ్వరూపం’. అనేక అవాంతరాల్ని దాటుకుని రెండేళ్ల కిందట రిలీజైన ఈ సినిమా సంచలన విజయం సాధించింది. కమల్ కు అంతర్జాతీయ స్థాయిలో ప్రశంసలు తెచ్చిపెట్టింది. సినిమా చివర్లో విశ్వరూపం-2 త్వరలో... అంటూ ఊరించి వదిలేశాడు కమల్. అప్పట్నుంచి కమల్ అభిమానులు ఎప్పుడెప్పుడా అని సినిమా కోసం ఎదురు చూస్తూనే ఉన్నారు. కానీ ఇప్పటిదాకా సినిమా విడుదలే కాలేదు. అలాగని సినిమా పూర్తి కాలేదా అంటే అదేమీ లేదు. ఎప్పుడో ఏడాదిన్నర కిందటే సినిమా కంప్లీట్ చేసేశాడు విశ్వ నాయకుడు. కానీ లేని పోని అవాంతరాలతో సినిమా ల్యాబ్‌ లో మగ్గుతోంది.

తొలి భాగాన్ని సొంతంగా నిర్మించిన కమల్.. రెండో పార్టుకి ఆస్కార్ రవిచంద్రన్ తో పెట్టుబడి పెట్టించాడు. అతనేదో ఆర్థిక ఇబ్బందుల్లో చిక్కుకుని ‘విశ్వరూపం-2’ పోస్ట్ ప్రొడక్షన్ పనుల్ని పక్కనబెట్టేశాడు. నెలల తరబడి ఓపిక పట్టిన కమల్.. విసిగి వేసారిపోయి.. సినిమాను పట్టించుకోవడం మానేశాడు. ఐతే ఆస్కార్ ఎంతకీ కోలుకునే అవకాశం లేకపోవడంతో కమల్ ఇప్పుడు తన సినిమా దుమ్ముదులపడానికి రంగంలోకి దిగినట్లు సమాచారం. ఇప్పటిదాకా పెట్టిన ఖర్చు మొత్తం ఆస్కార్ కు సెటిల్ చేసి సినిమాను తన చేతుల్లోకి తీసుకుంటున్నాడట. రాజ్ కమల్ ఇంటర్నేషనల్ సంస్థ పేరు మీదే సినిమా విడుదల కాబోతోందట. ‘చీకటి రాజ్యం’ పని పూర్తి చేసి.. వచ్చే నెలలో ‘విశ్వరూపం-2’ మీద దృష్టిపెట్టబోతున్నాడు కమల్. ఈ ఏడాది ఆఖర్లో విశ్వరూపం-2 ప్రేక్షకుల ముందుకు వచ్చే అవకాశాలున్నట్లు సమాచారం