ముగ్గురు ఒకే రోజు ఫైట్‌ చేసుకుంటారా?

తంబీలకు దీపావళి ప్రత్యేక పండగ. నరకాసురుడిని తగలబెట్టే రోజే వాళ్లకు అసలు సిసలు సంబరం మొదలవుతుంది. ప్రతి ఏడాది ఈ సీజన్‌లో స్టార్ల సినిమాలు రిలీజై బ్లాక్‌బస్టర్‌ హిట్స్‌ కొడుతుంటాయి. ఈసారి కూడా రేసులో ఓ ముగ్గురు స్టార్లు ఉన్నారు. విశ్వనటుడు కమల్‌హాసన్‌ నటించిన 'తూంగవనం' (చీకటి రాజ్యం) దీపావళి లక్ష్యంగా తెరకెక్కుతోంది. ఈ చిత్రంలో త్రిష కథానాయికగా నటిస్తున్న సంగతి తెలిసిందే. తెలుగు, తమిళ భాషల్లో ఏకకాలంలో తెరకెక్కుతోంది.

అలాగే తళా అజిత్‌ హీరోగా వీరం (వీరుడొక్కడే) శివ దర్శకత్వంలో ఓ చిత్రం తెరకెక్కుతోంది. ఇది అజిత్‌కి కెరీర్‌ 56వ సినిమా. శ్రుతిహాసన్‌ ఈ చిత్రం కోసమే నాగ్‌, కార్తీ సినిమాని వదులుకున్న సంగతి తెలిసిందే. అజిత్‌ దీపావళి బరినే టార్గెట్‌ చేసి వస్తున్నాడు. అలాగే హీరో సూర్య '24' అనే చిత్రంలో నటిస్తున్నాడు. 'మనం' ఫేం విక్రమ్‌కుమార్‌.బి ఈ చిత్రానికి దర్శకత్వం వహిస్తున్నాడు. కోలీవుడ్‌లో అత్యంత ప్రతిష్ఠాత్మకంగా తెరకెక్కుతున్న చిత్రమిది. కమల్‌హాసన్‌ సినిమాతో పాటు అజిత్‌, సూర్యల సినిమాలు కూడా తెలుగులోకి అనువాదమై రిలీజవుతాయి.