విశ్వరూపం-2 షూటింగా.. ఇదేం ట్విస్టు?

కమల్ హాసన్ స్వీయ దర్శకత్వంలో సినిమా తీసి హిట్టు కొట్టింది ఒక్క ‘విశ్వరూపం’ సినిమాతోనే. అంతకుముందు ఆయన డైరెక్ట్ చేసిన సినిమాలేవీ ఆశించిన ఫలితాన్నివ్వలేదు. హాలీవుడ్ స్థాయికి ఏమాత్రం తగ్గని రీతిలో ‘విశ్వరూపం’ సినిమాను తెరకెక్కించి మంచి విజయాన్నందుకున్నాడు కమల్. ఈ సినిమాకు కొనసాగింపుగా ఆయన తెరకెక్కించిన ‘విశ్వరూపం-2’ కోసం ప్రేక్షకులు కొన్నేళ్లుగా ఎదురు చూస్తున్నారు. ఐతే ఈ చిత్ర నిర్మాత ఆస్కార్ రవిచంద్రన్ ఆర్థిక సంక్షోభంలో చిక్కుకోవడంతో ఇది మరుగున పడిపోయింది. పోస్ట్ ప్రొడక్షన్ కార్యక్రమాలు పూర్తి చేయడానికి నిధులు లేక కమల్ ఈ సినిమాను పక్కన పెట్టేశాడు.

ఐతే ఎట్టకేలకు ఈ ఏడాది కమల్ ఆ చిత్రాన్ని తన చేతికి తీసుకుని.. పోస్ట్ ప్రొడక్షన్ కార్యక్రమాలు మొదలుపెట్టినట్లుగా చెప్పాడు. అవి అవ్వగానే సినిమాను విడుదలకు రెడీ చేస్తానన్నాడు. ఈ చిత్ర షూటింగ్ మూడేళ్ల కిందటే పూర్తయినట్లుగా కమల్ ఇంతకుముందు ప్రకటించాడు. కానీ ఇప్పుడు ఈ సినిమాకు సంబంధించిన కొత్త అప్ డేట్ ఏంటంటే.. ప్రస్తుతం చెన్నైలో కమల్ షూటింగ్ చేస్తున్నాడట. ఇందులో ఇంకా కొన్ని కీలక సన్నివేశాల చిత్రీకరణ చేయాల్సి ఉందట. చిత్ర బృందంలోని అందరినీ రప్పించి ఆ సీన్స్ తీస్తున్నాడట. ఐతే చివరగా షూటింగ్ చేసినప్పటికి.. ఇప్పటికి యూనిట్ సభ్యుల లుక్సే మారిపోయాయి. అందుకు హీరోయిన్ పూజా కుమారే ఉదాహరణ. ఆమె ఇప్పుడు షేపవుట్ అయిపోయింది. కమల్ కూడా ఇంతకుముందున్నట్లుగా లేడు. మరి సినిమాలో ఇప్పుడు తీసే సీన్స్ ఎలా సింక్ అవుతాయో చూడాలి. అసలు ఇంకా ఎన్ని రోజులు షూటింగ్ జరుగుతుందో.. ఇంతకూ పోస్ట్ ప్రొడక్షన్ ఎంత దాకా వచ్చిందో.. ఈ సినిమా ఎప్పుడు రిలీజవుతుందో చూడాలి మరి.