100 కోట్లు : లారెన్స్‌ కుమ్మేశాడు

ముని సిరీస్‌ లో వచ్చిన 'కాంచన 3' చిత్రం బి - సి సెంటర్లలో కుమ్మేస్తోంది. ఏ సెంటర్లలో పెద్దగా వసూళ్లను రాబట్టలేక పోతున్నా కూడా బి మరియు సి సెంటర్లలో రాబడుతున్న వసూళ్ల నేపథ్యంలో కాంచన 3 కి ఓవరాల్‌ గా మంచి వసూళ్లు నమోదు అవుతున్నాయి. తమిళనాడు మరియు తెలుగు రాష్ట్రాల్లో కలిపి మొదటి వారం పూర్తి అయ్యేప్పటికి ఏకంగా 100 కోట్ల గ్రాస్‌ ను వసూళ్లు చేసింది. ఈ విషయాన్ని చిత్ర యూనిట్‌ సభ్యులు అధికారికంగా ప్రకటించారు.

లారెన్స్‌ మూవీ 100 కోట్ల వసూళ్లను రాబట్టడం ఇదే ప్రథమం. గతంలో కాంచన మంచి విజయాన్ని సాధించినా కూడా ఈమార్క్‌ ను దక్కించుకోలేక పోయింది. అయితే ఈసారి పెద్ద ఎత్తున అంచనాలుండటంతో పాటు - ఎక్కువ సంఖ్య థియేటర్లలో సినిమా విడుదల అయిన కారణంగా మొదటి వారంలోనే వంద కోట్ల క్లబ్‌ లో చేరడం జరిగింది. లారెన్స్‌ స్వీయ దర్శకత్వంలో తెరకెక్కించిన ఈ చిత్రం మాస్‌ ఆడియన్స్‌ ను విశేషంగా ఆకట్టుకుంటుంది. దాంతో ఈ కలెక్షన్స్‌ సాధ్యం అయ్యాయి.

తెలుగు రాష్ట్రాల్లో జెర్సీ - మజిలీ - చిత్రలహరి వంటి డైరెక్ట్‌ చిత్రాలు ఉన్నా కూడా మాస్‌ ఆడియన్స్‌ మాత్రం కాంచన 3 చిత్రానికే పట్టం కట్టడం ఆశ్చర్యంగా ఉంది. కమర్షియల్‌ ఎలిమెంట్స్‌ ఉండటంతో పాటు - హర్రర్‌ సినిమా అవ్వడం - కాంచన అనే టైటిల్‌ పెట్టడం వల్ల ఈ చిత్రంపై ప్రేక్షకులు ఆసక్తి చూపిస్తున్నారు. కాంచన 3 చిత్రం సూపర్‌ హిట్‌ అయిన నేపథ్యంలో కాంచన 4ను కూడా త్వరలోనే లారెన్స్‌ మొదలు పెట్టడం ఖాయంగా కనిపిస్తోంది. గత చిత్రాలతో పోల్చితే కాంచన 3 హర్రర్‌ కాస్త తగ్గినట్లుగా అనిపించినా మాస్‌ ఎలిమెంట్స్‌ తో లారెన్స్‌ కుమ్మేశాడు.