పాటలతో ‘కంచె’ కట్టిన వాడెవడబ్బా!

మొదలుపెట్టినపుడు తెలియలేదు ‘కంచె’లో ఇంత విషయముందని. ఇప్పుడందరూ ఎప్పుడెప్పుడా అని ఆ సినిమా కోసం ఎదురు చూస్తున్నారు. ఇంకో రెండు వారాల్లోనే ఈ సినిమా ప్రేక్షకుల ముందుకు వచ్చేయబోతోంది. ఈ రోజే ఆడియో విడుదల. రామ్ చరణ్ చేతుల మీదుగా ‘కంచె’ ఆడియో విడుదల కాబోతోంది. హైదరాబాద్ లో భారీ ఎత్తున ఆడియో వేడుక నిర్వహించబోతున్నారు.

ఐతే కంచె ట్రైలర్ లో విజువల్స్ చూసి మెస్మరైజ్ అయిపోయిన జనాలు ఈ సినిమాకు సంగీతం అందించిందెవరన్నది పెద్దగా పట్టించుకోలేదు. ఈ సినిమా కోసం ఓ బాలీవుడ్ టాలెంటెడ్ మ్యూజిక్ డైరెక్టర్ని క్రిష్ టాలీవుడ్ కి పట్టుకొచ్చిన సంగతి ఎవరూ గుర్తించలేదు. ఆ మ్యూజిక్ డైరెక్టర్ పేరు.. చిరంతన్ భట్. క్రిష్ బాలీవుడ్ మూవీ ‘గబ్బర్ ఈజ్ బ్యాక్’లో కొన్ని పాటలు అతనే కంపోజ్ చేశాడు. ఇంకో పది సినిమాల దాకా చేశాడు. ‘కంచె’తో తెలుగులో అరంగేట్రం చేశాడు.

ఆడియో ఫంక్షన్ నేపథ్యంలో శాంపిల్ కి శ్రియ ఘోషల్ పాడిన నిజమేనని నమ్మనీ అనే పాట టీజర్ ముందు రోజు రిలీజ్ చేశాడు. అది వింటేనే చిరంతన్ భట్ టాలెంట్ ఏంటో అర్థమైపోయింది. క్రిష్ టేస్టుకు తగ్గట్లే మంచి పాటలిచ్చినట్లున్నాడు చిరంతన్. శంకర్ మహదేవన్, విజయ్ ప్రకాష్ లాంటి టాప్ సింగర్స్ ‘కంచె’ పాటలు పాడారు. అన్ని పాటల్నీ క్రిష్ ఆస్థాన గీత రచయిత సిరివెన్నెల సీతారామ శాస్త్రే రాయడం విశేషం. మొత్తం ఆల్బం ఎలా ఉంటుందో ఈ రోజు సాయంత్ర విని తెలుసుకుందాం.