చాంపేన్‌ బాటిల్‌ 'కంచె' తెంచారు

మొత్తానికి దర్శకుడు క్రిష్‌ కూడా.. 'బాగుంది' అనే మాట నుండి.. 'బలేగా ఉందే' అనే మాట అనిపించుకునే స్థాయికి వచ్చాడు. ఎందుకంటే క్రిష్‌ సినిమాల్లో కంటెంట్‌ ఎంత అద్భుతహా అనిపించినా కూడా.. చివరకు ఎక్కడో ఏదో వెలితి. డైలాగుల్లో కనిపించిన సత్తా సీన్‌ లో కానరాలేదని.. సీన్‌ లో ఉన్న కంటెంట్‌ ను యాక్టర్లు చూపించలేకపోయారని.. చాలా విమర్శలే ఎదుర్కున్నాడు. కాని ఇప్పుడు వాటికి 'కంచె' తెగింది.

తొలిసారిగా తొలిరోజునే పాజిటివ్‌ టాక్‌ అందుకున్నాడు క్రిష్‌. అలాగే తొలి సినిమాతో అస్సలు హిట్టు చాయలకు కూడా వెళ్లలేదే అయ్యో అనుకున్న మెగా హీరో వరుణ్‌ తేజ్‌.. ఇప్పుడు ఒక మాంచి సినిమా చేశాడని అనిపించుకున్నాడు. మొదటి సినిమా ఘోరంగా ఫ్లాపై అసలు ఆడియన్సుకే తెలియకుండా పోయినా.. రెండో సినిమాలో మాత్రం రాణిలా ఉంది అంటూ ప్రగ్యా జైస్వాల్‌ మార్కులు వేయించేసుకుంది. అసలు తెలుగురాని సంగీత దర్శకుడు అంటూ కామెంట్లు వేయించుకున్న చిరంతన్‌ బట్ ఇప్పుడు అభినందనలు కూడా కురిపించుకుంటున్నాడు. ఇక సీతారామశాస్ర్తి సాహిత్యం గురించి చెప్పక్కర్లేదు.

కట్‌ చేస్తే.. ఈ సందర్భాన్ని ఎంజాయ్‌ చేయడానికి ఇప్పుడు కంచె టీమ్‌ ఒక చాంపేన్‌ బాటిల్‌ ను ఓపెన్‌ చేసి మరీ సెలబ్రేట్‌ చేసుకున్నారు. నగరంలోని ఒక ప్రముఖ బేకరీ వద్ద వీరి సక్సెస్‌ పార్టీ జరిగింది. అందరి కళ్లలో ఫ్లడ్‌ లైట్ల రేంజులో వెలుతురు వెలుగుతోంది అంతే.