సూపర్‌ స్టార్ సినిమా వదులుకున్న బాలీవుడ్ ఫైర్ బ్రాండ్..!

'పోకిరి'... సూపర్‌ స్టార్ మహేష్ బాబు కెరీర్‌ ను మలుపు తిప్పిన బ్లాక్ బస్టర్ మూవీ. పూరి జగన్నాథ్ దర్శకత్వంలో తెరకెక్కిన ఈ సినిమా అప్పటి దాకా ఉన్న తెలుగు సినిమా రికార్డ్‌ లను తిరగరాసింది. ఈ చిత్రాన్ని పూరీ జగన్నాథ్ వైష్టో అకాడమీ మరియు మంజుల ఇందిరా ప్రొడక్షన్స్‌ లో సంయుక్తంగా నిర్మించారు. ఈ సినిమాలో మహేష్ బాబుకు జోడిగా గోవా బ్యూటీ ఇలియానా నటించింది. ఈ సినిమాతో ఇలియానా స్టార్ హీరోయిన్ గా మారిపోయింది. వరుస అవకాశాలతో కొన్నేళ్లపాటు టాలీవుడ్ ఇండస్ట్రీని ఏలిందని చెప్పవచ్చు. అయితే ఈ సినిమాలో హీరోయిన్‌ గా మొదటి చాయిస్ ఇలియానా కాదట. ముందగా ఓ బాలీవుడ్‌ బ్యూటీని సంప్రదించిన తరువాత కుదరక ఇలియానాను తీసుకున్నారట. ఈ విషయాన్ని 'పోకిరి'ని మిస్ చేసుకున్న ఆ బాలీవుడ్ బ్యూటీనే స్వయంగా వెల్లడించింది. ఆ ముద్దుగుమ్మ మరెవరో కాదు. బాలీవుడ్‌ భామ ఫైర్ బ్రాండ్ కంగనా రనౌత్‌.

కంగ‌న ఓ ఇంట‌ర్వ్యూలో మాట్లాడుతూ.. 'గ్యాంగ్‌ స్ట‌ర్' సినిమా ఆడిష‌న్స్‌ కు వెళ్లిన స‌మ‌యంలోనే 'పోకిరి' సినిమా ఆడిష‌న్స్ జ‌రిగాయ‌ని.. ఈ రెండు చిత్రాల‌కు తాను ఎంపిక‌య్యాన‌ని.. అయితే ముందుగా గ్యాంగ్‌ స్టర్ మూవీకి డేట్స్ ఇచ్చేయ‌డంతో 'పోకిరి' చిత్రాన్ని వ‌దులుకోవాల్సి వ‌చ్చింద‌ని తెలిపింది. 'పోకిరి' సినిమాలో తాను నటించి ఉంటే... టాలీవుడ్ లో టాప్ హీరోయిన్ అయ్యేదాన్నని చెప్పిందట. టాలీవుడ్ గేమ్ ఛేంజ‌ర్‌'గా మారిన పోకిరి చిత్రాన్ని కంగ‌నా అలా మిస్ చేసుకంద‌న్న మాట‌. ఒకవేళ ఆ సినిమా కంగనా చేసి ఉంటే ఖచ్చితంగా టాలీవుడ్ లో టాప్ హీరోయిన్ గా వెలుగుతూ ఉండేదని చెప్పవచ్చు. కానీ ఆ తర్వాత టాలీవుడ్ లో పూరి జగన్నాథ్ - యంగ్ రెబల్ స్టార్ ప్రభాస్ కాంబినేషన్ లో వచ్చిన 'ఏక్ నిరంజన్' చిత్రంలో కంగన నటించింది. కానీ ఈ సినిమా ఆశించిన స్థాయిలో విజయం సాధించలేదు. ఆ తర్వాత మరే తెలుగు సినిమాలో కనిపించని కంగన 'మణికర్ణిక' డబ్బింగ్ సినిమాతో తెలుగు ప్రేక్షకులను పలకరించింది. అయితే కంగనా రనౌత్ బాలీవుడ్ అగ్ర హీరోయిన్లలో ఒకరుగా నిలిచారని చెప్పవచ్చు. హీరోయిన్ గానే కాకుండా దర్శకురాలిగా కూడా తన ప్రతిభను నిరూపించుకుంది. అంతేకాదు హీరోలకు సైతం సవాళ్లు విసురుతూ ఎప్పుడూ వివాదాలతో సహవాసం చేస్తూ బీటౌన్ ను షేక్ చేస్తుంటుంది. ప్రస్తుతం దివంగత తమిళ ముఖ్యమంత్రి జయలలిత జీవితాధారంగా తెరకెక్కుతున్న చిత్రంలో కంగనా నటిస్తున్నారు.