కంగ‌న వేషంపై ఆలియా ప్ర‌శంస‌లా?

న‌ట‌వార‌సుల(నెప్టోయిజం) పై కంగ‌న - రంగోలి సిస్ట‌ర్స్ ఏ రేంజులో విరుచుకుప‌డతారో తెలిసిందే. ముఖ్యంగా ఆలియా భ‌ట్ లాంటి ప్ర‌తిభావంతురాలైన న‌టిని ఆ ఇద్ద‌రూ నిరంత‌రం ఏదో ఒక సంద‌ర్భంలో తూల‌నాడుతూనే ఉన్నారు. అయినా అదేమీ ప‌ట్టించుకోకుండా ఆలియా నుంచి కంగ‌నకు వ‌చ్చిన ఆ పొగ‌డ్త హాట్ టాపిక్ గా మారింది. అస‌లేమైంది? సంద‌ర్భ‌మేమిటి? అంటే...

కంగ‌న క‌థానాయిక‌గా న‌టిస్తున్న పంగా ట్రైల‌ర్ ఇటీవ‌ల రిలీజైన సంగ‌తి తెలిసిందే. ఇందులో మ‌రో ప్ర‌యోగాత్మ‌క పాత్ర‌లో కంగ‌న న‌టిస్తోంది. క‌బ‌డ్డీ ప్లేయ‌ర్ జ‌య నిగ‌మ్ గా ఛాలెంజింగ్ రోల్ పోషిస్తోంది. ఇక ఇందులో జ‌య నిగ‌మ్ జీవితంలోని ఎమోష‌న్స్ ని తెర‌పై ఆవిష్క‌రిస్తున్నారు. జ‌య నిగ‌మ్ రైల్వే టికెట్ ఎగ్జిక్యూటివ్.. అలాగే ఒక మిడిల్ క్లాస్ యువ‌తిగా.. పెళ్ల‌యిన స్త్రీగా.. మ‌ద‌ర్ గా న‌టిస్తోంది. అందుకే ఇప్పుడు త‌న క్యారెక్ట‌ర్ ని రివీల్ చేస్తూ కంగ‌న వేసిన వేషం హాట్ టాపిక్ గా మారింది.

నిన్న ట్రైల‌ర్ ప్ర‌మోష‌న్ కోసం కంగ‌న వేసిన ఫీట్ హాట్ టాపిక్ గా మారింది. ఒక రోజంతా ఈ అమ్మ‌డు ఛ‌త్ర‌ప‌తి శివాజీ మ‌హరాజ్ టెర్మిన‌స్ (ముంబై) వ‌ద్ద క‌నిపించింది. అక్క‌డ కౌంట‌ర్లో రైల్ టిక్కెట్లు అమ్ముతూ షాకిచ్చింది. అయితే త‌న‌దైన శైలిలో యూనిక్ మార్గంలో పంగాకు ప్రచారం చేసింది. ప్ర‌స్తుతం ఈ వీడియో జ‌నాల్లో వైర‌ల్ గా మారింది. ష‌ల్వార్ కాట‌న్ సూట్ లో చాలా సింపుల్ లుక్ తో కంగ‌న ఆక‌ట్టుకుంది. అలాగే త‌న‌ మేక‌ప్ కూడా అంతంత మాత్రంగానే ఉంది. ఇక కంగ‌న టిక్కెట్లు అమ్ముతోంద‌ని తెలిసీ ఆ వీడియోని ఫ్యాన్స్ అంతా సోష‌ల్ మీడియాలో పోస్ట్ చేసి ప్ర‌చారం చేశారు. ఈ వీడియోకి అభిమానుల నుంచి అద్భుత స్పంద‌న‌లు వ‌చ్చాయి. ఇక దీపిక త‌ర్వాత నువ్వే అంటూ ఫ్యాన్స్ కంగ‌న‌ను ఆకాశానికెత్తేశారు. ప్రియాంక చోప్రా.. ఆలియా భ‌ట్ లాంటి స్టార్లు కంగ‌న‌ను పొగిడేయ‌డం ఆస‌క్తిక‌రం. ఇలా రోజంతా టిక్కెట్ కౌంట‌ర్ కి అంకిత‌మైన కంగ‌న పై ఆలియా త‌న‌దైన శైలిలో పొగ‌డ్త‌లు కురిపించింది. త‌న‌ని నిత్యం ఆడిపోసుకునే కంగ‌న‌పై ఆలియా స్పంద‌న ఆశ్చ‌ర్యం క‌లిగించింది.