దర్శకేంద్రుడి కోడలు.. బ్యాక్ టు బాలీవుడ్

సైజ్ జీరో సినిమాతో తన దశ తిరిగిపోతుందని అనుకుంది రాఘవేంద్రరావు కోడలు కనిక థిల్లాన్. ఆ సినిమాకు కథ, స్క్రీన్ ప్లే కనికనే అందించింది. విడుదలకు ముందు ‘సైజ్ జీరో’ సౌత్ ఇండియాలో హాట్ టాపిక్ అయింది. అంచనాలకు తగ్గట్లు సినిమా ఆడి ఉంటే కథ మరోలా ఉండేది. కనిక పేరు మార్మోగిపోయేది. కానీ ఆ సినిమా దారుణమైన ఫలితాన్నిచ్చింది. దీంతో ఇక సౌత్ సినిమాల సంగతి వదిలేసి.. తన టేస్టుకు తగ్గ బాలీవుడ్ లోనే అదృష్టాన్ని పరీక్షించుకోవాలనుకుంటోంది కనిక. ఇంతకుముందు షారుఖ్ హీరోగా నటించిన ఓం శాంతి ఓం - రా.వన్ సినిమాలకు స్క్రిప్టు అందించిన కనిక.. ఈసారి ఓ చిన్న సినిమాకు కథ - స్క్రీన్ ప్లే అందిస్తోంది.

ఆయుష్మాన్ ఖురానా ప్రధాన పాత్రలో తెరకెక్కబోయే సినిమా కోసం బౌండెడ్ స్క్రిప్టు రాసి అప్పగించింది కనిక. ఆ సినిమా పేరు ‘మన్మార్జియాన్’. దీనికి డైలాగులు కూడా కనికనే రాయడం విశేషం. పంజాబ్ బ్యాక్ డ్రాప్ లో సాగే ఈ సినిమాలో ఆయుష్మాన్ సరసన భూమి పడ్నేకర్ కథానాయికగా నటిస్తుండటం విశేషం. వీళ్లిద్దరి కాంబినేషన్లో గత ఏడాది వచ్చిన ‘దమ్ లగా కే హైషా’ సెన్సేషనల్ హిట్టయిన సంగతి తెలిసిందే. తను వెడ్స్ మను ఫేమ్ ఆనంద్ ఎల్.రాయ్ ఈ చిత్రాన్ని నిర్మిస్తుండగా.. సమీర్ వర్మ దర్శకత్వం వహిస్తున్నాడు. ఈ సినిమా హిట్టయితే కనిక మళ్లీ బాలీవుడ్లో బిజీ అయిపోతుందేమో.