క‌ర‌ణ్ గొప్ప ఘ‌న‌తే సాధించాడ‌బ్బా

బాలీవుడ్ నిర్మాత‌- ద‌ర్శ‌కుడు అయిన క‌ర‌ణ్ జోహార్ కి ఓ అరుదైన ఘ‌న‌త ద‌క్కింది. మ‌డమ్‌ టూస‌డ్స్ వాక్స్ లండ‌న్‌ మ్యూజియంలో క‌ర‌ణ్ జోహార్‌కి చోటు ద‌క్క‌నుంది. ఇక్క‌డ మ‌న యంగ్ రెబ‌ల్ స్టార్ బాహుబ‌లి ప్ర‌భాస్ ద‌గ్గ‌ర్నుంచి షారుక్ ఖాన్‌- ఐశ్వ‌ర్య రాయ్‌- క‌రీనా క‌పూర్‌- అమితాబ్ వంటి సెలబ్రిటీలు ఎంద‌రికో ఈ మ్యూజియంలో చోటుద‌క్కింది. అయితే తెర వెన‌కుండే భార‌తీయ ద‌ర్శ‌క నిర్మాత‌కి ఇక్క‌డ చోటు ద‌క్క‌డం మాత్రం ఇదే ప్ర‌థ‌మం.

అతి త్వ‌ర‌లో ఈ భార‌తీయ ద‌ర్శ‌క నిర్మాత మైన‌పు బొమ్మ‌ను లండ‌న్ మ్యూజియంలో పెట్ట‌బోతున్నారు. ఈ సంద‌ర్భంగా త‌న సంతోషాన్ని ట్విట్ట‌ర్ ద్వారా అభిమానుల‌తో పంచుకున్నాడు క‌ర‌ణ్ జోహ‌ర్‌. గ‌త వారం లండ‌న్ వెళ్లిన క‌ర‌ణ్ అక్క‌డ మ్యూజియం క్రియేటివ్ డైరెక్ట‌ర్స్ ను క‌లిసి మైన‌పు విగ్ర‌హ ఏర్పాటుకు కావల్సిన కొల‌త‌ల‌ను ఇచ్చి వ‌చ్చాడ‌ట కూడా. దీంతో క‌ర‌ణ్ విగ్ర‌హానికి ప‌నులు మొద‌ల‌య్యాట‌. లండ‌న్ మ్యూజియంలో చోటు ద‌క్కించుకున్న మొట్ట‌మొద‌టి ఇండియ‌న్‌ ఫిల్మ్ మేక‌ర్ కావ‌డం గ‌ర్వంగా ఉందంటూ ట్విట్ట‌ర్ ద్వారా అభిమానులతో సంతోషాన్ని పంచుకున్నాడు క‌ర‌ణ్ జోహార్‌. అంతేకాకుండా ఆయ‌న సినీ కెరీయ‌ర్ కి ఈ ఏడాదితో 20 ఏళ్లు కూడా పూర్తి కావ‌స్తోంది.

షారుక్ ఖాన్‌- కాజ‌ల్ - రాణి ముఖ‌ర్జీ కాంబినేష‌న్లో క‌ర‌ణ్ జోహార్ ద‌ర్శ‌క‌త్వంలో వ‌చ్చిన కుచ్ కుచ్ హోతా హై సినిమా అక్టోబ‌ర్ 16- 1998లో విడుద‌లై అద్భుత విజ‌యం సాధించింది. ఆ త‌ర్వాత క‌ర‌ణ్ ద‌ర్శ‌కుడిగా- నిర్మాత‌గా- ర‌చ‌యిత‌గా రాణించి బాలీవుడ్ లో తిరుగులేని ఇమేజ్ తెచ్చుకున్న సంగ‌తి తెలిసిందే. కాఫీ విత్ క‌ర‌ణ్ షో ద్వారా బుల్లితెర మీద స‌క్సెస్ సాధించాడు క‌ర‌ణ్‌.