ఆమిర్ ఖానా మ‌జాకా.. ఆమెకు కూడా ఆడిష‌న‌ట‌!

ఏదైనా పాత్ర‌కు కొత్త ఆర్టిస్టును తీసుకోవాల‌నుకున్న‌పుడు ఆడిష‌న్స్ నిర్వ‌హించ‌డం మామూలే. అప్పుడే కెరీర్ ఆరంభించిన వాళ్లు మాత్ర‌మే ఆడిష‌న్ ఇస్తారు. ఇక పెద్ద కుటుంబాల నుంచి వ‌చ్చిన న‌టీన‌టుల‌కైతే కెరీర్ కొత్త‌లో కూడా ఆడిష‌న్స్ అవ‌స‌రం ఉండ‌దు. చాలా సింపుల్‌గా అవ‌కాశాలు వ‌చ్చేస్తుంటాయి. ఐతే బాలీవుడ్ లో ఒక పెద్ద కుటుంబానికి చెందిన హీరోయిన్.. అందులోనూ ద‌శాబ్దంన్న‌ర‌కు పైగా అనుభ‌వం ఉన్న న‌టి.. ఇప్పుడు కొత్త‌గా త‌న పాత్ర కోసం ఆడిష‌న్ ఇవ్వాల్సి వ‌చ్చింద‌ట‌. ఆ హీరోయిన్ క‌పూర్ వార‌సురాలు క‌రీనా కాగా.. ఆమె ఆడిష‌న్ ఇచ్చిన సినిమా ఆమిర్ ఖాన్ క‌థానాయ‌కుడిగా న‌టిస్తున్న లాల్ సింగ్ చ‌ద్దా.

తాను హీరోయిన్‌గా ప‌రిచ‌య‌మైన సినిమాకు సైతం ఆడిష‌న్ ఇవ్వ‌లేద‌ని.. ఇన్నేళ్ల‌లో మ‌రే చిత్రానికీ ఇలా జ‌ర‌గ‌లేద‌ని... కానీ లాల్ సింగ్ చ‌ద్దాకు మాత్రం ఆడిష‌న్ ఇవ్వాల్సి వ‌చ్చింద‌ని త‌న కొత్త సినిమా గుడ్ న్యూస్ ప్ర‌మోష‌న్ల‌లో భాగంగా క‌రీనా వెల్ల‌డించింది. ‘‘నా కెరీర్‌ లో ఆడిషన్స్‌ లో పాల్గొన్న మొదటి సినిమా ‘లాల్‌ సింగ్‌ చద్దా'. ఇప్పటి వరకూ నేను ఏ సినిమా కోసం ఇలా చేయలేదు. ఈ ప్రపంచంలో ఆమీర్‌ కోసం తప్ప మరెవరి కోసం ఇలా చేయను. ఇది నాకు కొత్త అనుభ‌వం'' అని కరీనా చెప్పుకొచ్చింది. ఆమిర్ ఖాన్ సినిమా అంటే ఏదైనా ప‌ర్ఫెక్ట్‌గా ఉండాల్సిందే. త‌న సినిమాల విష‌యంలో అత‌ను తీసుకునే శ్ర‌ద్ధ అలా ఉంటుంది. అందులోనూ థ‌గ్స్ ఆఫ్ హిందుస్థాన్ డిజాస్ట‌ర్ కావ‌డంతో త‌న కొత్త సినిమా విష‌యంలో మ‌రింత జాగ్ర‌త్త ప‌డుతున్న‌ట్లున్నాడు. హాలీవుడ్ హిట్ మూవీ ఫారెస్ట్ గంప్ ఆధారంగా ఈ చిత్రం తెర‌కెక్కుతున్న సంగ‌తి తెలిసిందే.