‘ఆర్ఆర్ఆర్’ను ఇష్టంతో కాదు.. దేశం కోసం చూడాలా?

ఎంత సినిమా ప్రమోషన్ అయితే మాత్రం.. నోటికి వచ్చినట్లుగా మాట్లాడేయటమా? అందులోనూ ఒక రాష్ట్రానికి ముఖ్యమంత్రిగా ఉన్న ముఖ్యనేత తానో వాణిజ్య సినిమా గురించి మాట్లాడేటప్పుడు కాస్తంత జాగ్రత్తగా మాట్లాడాలన్న విషయాన్ని మర్చిపోయినట్లుగా కనిపిస్తోంది.

ఒక తెలుగు సినిమా అయి ఉండి.. ఆ సినిమా ప్రమోషన్ కోసం రెండు తెలుగు రాష్ట్రాల్ని వదిలి.. పొరుగున ఉన్న కర్ణాటకకు వెళ్లి మరీ భారీ కార్యక్రమాన్ని చేపట్టటం సరే. ఆ ప్రోగ్రాంకు కర్ణాటక రాష్ట్ర ముఖ్యమంత్రి బసవరాజు బొమ్మైని ఆహ్వానించటం తప్పేం కాదు.

కానీ.. ఆ సినిమా గురించి.. దాని గొప్పతనం గురించి చెప్పే క్రమంలో.. ప్రతి ఒక్కరు ఆర్ఆర్ఆర్ సినిమాను టికెట్ కొనుక్కొని థియేటర్ కు వెళ్లి చూడాలని చెప్పటాన్ని కొంతమేర అర్థం చేసుకోవచ్చు. కానీ.. ఈ సినిమాను చూసే వారికి దేశభక్తిని లింకు పెట్టటంపైనే అభ్యంతరమంతా. దేశాన్ని ప్రేమించే వారంతా.. టికెట్ కొనుక్కొని థియేటర్ కు వెళ్లి మూవీ చూడాలని చెప్పటాన్ని తప్పు పట్టకుండా ఉండలేం.

ఈ సినిమా ఫక్తు కమర్షియల్ సినిమా. ఫాంటసీ ఆలోచనలతో తీసిన ఈ మూవీకి దేశానికి లింకేమిటి? ఈ సినిమాను చూసేటోళ్లకు దేశభక్తి ఉన్నట్లు లాంటి మాటలేంది? అన్నది ప్రశ్న. ఒక సినిమాను సినిమాగా ప్రమోట్ చేయటానికి భిన్నంగా దేశాన్ని.. దేశభక్తిని లింకు పెట్టటం సరికాదు.

ఇప్పటికే ఈ సినిమా కోసం టికెట్ల ధరల్ని భారీగా పెంచేయటంతో సామాన్య కుటుంబాల వారు ఈ విజువల్ ఫీస్టును థియేటర్ లో చూసేందుకు జంకే పరిస్థితి.

ఒకవేళ.. ఈసినిమా చూడాలన్న తపనతో దాన్ని చూసినా.. ఆ ఖర్చు కారణంగా వేరే వాటి విషయంలో రాజీ పడటం ఖాయమని చెప్పాలి. సినిమాను సినిమాగా చెప్పటం.. అందరూ ఆదరించాలని కోరుకోవటం బాగానే ఉంటుంది కానీ.. మూవీకి దేశ భక్తికి లింకు పెట్టటం ఏ మాత్రం సరికాదన్నది మర్చిపోకూడదు.