ఇదెక్కడి న్యాయం 'చినబాబు'-ఫస్ట్ లుక్

ఆ మధ్య చెప్పుకోదగ్గ సక్సెస్ లేక ఇబ్బంది పడిన కార్తిని ఖాకీ మూవీ బాగానే కాపాడింది. తెలుగులో సైతం డీసెంట్ హిట్ అనిపించుకుని వసూళ్ళ పరంగా కూడా సేఫ్ ప్రాజెక్ట్ గా మిగిలింది. అంతకు ముందు కాష్మోరా ఇచ్చిన షాక్ నుంచి కొంత కాలం కోలుకోలేకపోయిన కార్తి స్ట్రెయిట్ మూవీ ఊపిరితో మంచి హిట్టే కొట్టినా ఎక్కువ క్రెడిట్ నాగార్జున ఖాతాలోకి వెళ్ళిపోవడంతో సోలో హిట్ కోసం ఎదురు చూసాడు. ఇప్పుడు మరో కొత్త సినిమాతో రావడానికి సిద్ధ పడుతున్నాడు. పాండి రాజ్ దర్శకత్వంలో రూపొందుతున్న కొత్త సినిమా తెలుగు వెర్షన్ కి చినబాబు అనే టైటిల్ ఫిక్స్ చేసి ఫస్ట్ లుక్ పోస్టర్ కూడా విడుదల చేసారు . గ్రీన్ స్టూడియోస్ తో సంబంధం లేకుండా అన్నయ్య సూర్య నిర్మిస్తున్న ఈ మూవీకి ఇమ్మాన్ మ్యూజిక్ ఇస్తున్నాడు. పక్కా పల్లెటూరి మాస్ గెటప్ తో బులెట్ బండి మీద నవ్వుతూ ఉన్న కార్తి గెటప్ బాగా ఆకట్టుకుంటోంది.

కాని ఒకటి మాత్రం విమర్శలకు అవకాశం ఇచ్చేలా ఉంది. కార్తి కూర్చున్న బండి మీద ఫ్రంట్ నెంబర్ ప్లేట్ మీద తమిళ్ లో రైతు అని అర్థం వచ్చేలా అదే బాషలో అక్షరాలు ఉంటే తెలుగు పోస్టర్ లో మాత్రం మన అక్షరాలకు బదులు ఫార్మర్ అని ఇంగ్లీష్ లో రాసి ఉండటం చూస్తే వాళ్ళకు ఉన్న బాషాభిమానం మనకు లేదా అని చెప్పడానికి ఉద్దేశించినట్టు అనిపిస్తోంది. సోషల్ మీడియాలో దీన్నే ప్రశ్నిస్తూ కామెంట్స్ కూడా మొదలయ్యాయి. ఇక్కడ కూడా రైతు అని అచ్చంగా తెలుగులో రాస్తే మనవాళ్ళు చూడరనా లేక నామోషినో నిర్మాత చెబితే బాగుంటుంది. పైగా కార్తి పల్లెటూరి వాడిగా నటిస్తున్నప్పుడు ఇంగ్లీష్ లో ఎలా రాసుకుంటాడు అని చిన్న లాజిక్ కూడా ఉంటుంది కదా . తమిళ్ లో ఉన్న లాజిక్ తెలుగులో ఎలా మాయమయ్యింది.

టైటిల్ మాత్రం బాగా క్యాచిగా ఉంది. ఇదే టైటిల్ తో ఇరవై ఏళ్ళ క్రితం నాగార్జున, అమల జంటగా సురేష్ ప్రొడక్షన్స్ బ్యానర్ లో ఒక సినిమా వచ్చింది. ఓ మోస్తరుగా ఆడింది. మళ్ళి అదే టైటిల్ తో కార్తి రావడం విశేషం. ఆ మధ్య పెదబాబుగా జగపతిబాబు వచ్చాడు. ఇప్పుడు చినబాబుగా కార్తి వస్తున్నాడు. సమ్మర్ లో రిలీజ్ ప్లాన్ చేసిన ఈ మూవీ డీటెయిల్స్ ఇంకా రావాల్సి ఉంది.