రంగంలోకి దిగుతున్న 'కార్తికేయ 2'

నిఖిల్ కెరియర్లో చెప్పుకోదగిన చిత్రాల జాబితాలో 'కార్తికేయ' కనిపిస్తుంది. చందూ మొండేటి దర్శకత్వంలో 2014లో వచ్చిన ఈ సినిమా, అనూహ్యమైన విజయాన్ని సాధించింది. సుబ్రహ్మణ్యస్వామి ఆలయం చుట్టూ తిరిగే ఈ కథ ఆసక్తికరంగా సాగుతూ ప్రేక్షకులను ఎంతగానో ఆకట్టుకుంది. దాంతో విడుదలైన ప్రతి కేంద్రంలోను భారీవసూళ్లను రాబట్టింది. అలాంటి ఈ సినిమాకి సీక్వెల్ చేయాలని చందూ మొండేటి - నిఖిల్ అప్పుడే నిర్ణయించుకున్నారు.

అయితే ఆ తరువాత ఎవరి ప్రాజెక్టులతో వాళ్లు బిజీ అయిన కారణంగా, ఈ ప్రాజెక్టు ఆలస్యమవుతూ వచ్చింది. క్రితం ఏడాది చందూ ఈ సీక్వెల్ కి కథను సిద్ధం చేసుకుని, దానిపై గట్టిగానే కసరత్తు చేశాడు. 'కార్తికేయ 2' చేయడానికి నిఖిల్ కూడా గ్రీన్ సిగ్నల్ ఇచ్చాడు. ఓ శుభ ముహూర్తాన ఈ సినిమాను మొదలుపెట్టారు కూడా. అయితే ఆ తరువాత కరోనా కారణంగా ఆగిపోయిన ప్రాజెక్టుల జాబితాలో ఈ సినిమా కూడా చేరిపోయింది. అలా ఆగిపోయిన సినిమాలు ఇప్పుడిప్పుడే కొత్త ఉత్సవాహంతో మళ్లీ పట్టాలెక్కుతున్నాయి.

ఈ నేపథ్యంలోనే 'కార్తికేయ 2' కూడా రంగంలోకి దిగుతోంది. లాక్ డౌన్ తరువాత నిఖిల్ '18 పేజెస్' సినిమా చేయడంలో బిజీ అయ్యాడు. గీతా ఆర్ట్స్ 2 బ్యానర్ పై బన్నీ వాసు నిర్మాణంలో ఈ సినిమా రూపొందుతోంది. ఇప్పుడు ఆ సినిమా చిత్రీకరణ ముగింపు దశకి చేరుకుంది. దాంతో ఆ వెంటనే సెట్స్ పైకి వెళ్లడానికి చందూ మొండేటి సన్నాహాలు చేసుకుంటున్నాడు. ఈ నెల చివరి వారంలోగానీ, వచ్చేనెల తొలి వారంలోగాని ఈ సినిమా రెగ్యులర్ షూటింగు మొదలవుతుందని చెబుతున్నారు. ఈ ఏడాది ద్వితీయార్ధంలోనే ఈ సినిమా విడుదల కానుంది.