'కార్తికేయ 2' రిలీజ్ డేట్ ఫిక్స్.. నితిన్ ను ఢీకొట్టనున్న నిఖిల్..!

యువ హీరో నిఖిల్ సిద్ధార్థ మరియు అనుపమ పరమేశ్వరన్ జంటగా నటించిన తాజా చిత్రం ''కార్తికేయ 2''. చందూ మొండేటి దర్శకత్వంలో తెరకెక్కిన ఈ సినిమాపై అందరిలో ఆసక్తి నెలకొంది. ఇప్పటికే విడుదల చేయబడిన ప్రమోషనల్ కంటెంట్ సినిమాకు మంచి బజ్ తెచ్చిపెట్టింది.

సూపర్ నేచురల్ మిస్టికల్ అడ్వెంచర్ థ్రిల్లర్ గా తెరకెక్కిన 'కార్తికేయ 2' చిత్రాన్ని ముందుగా జూలై 22న విడుదల చేయాలని ప్లాన్ చేయగా.. చివరి నిమిషంలో వాయిదా వేశారు. ఈ నేపథ్యంలో తాజాగా మేకర్స్ సరికొత్త రిలీజ్ డేట్ ను అనౌన్స్ చేశారు.

'కార్తికేయ 2' చిత్రాన్ని ఆగస్టు 12న ప్రపంచ వ్యాప్తంగా థియేటర్లలో విడుదల చేయబోతున్నట్లు నిర్మాతలు ప్రకటించారు. అంతేకాదు పాన్ ఇండియా స్థాయిలో తెలుగుతో పాటుగా హిందీ, తమిళం, కన్నడ, మలయాళ భాషల్లో రిలీజ్ చేస్తున్నట్లు పేర్కొన్నారు.

ఈ మేరకు మేకర్ రిలీజ్ డేట్ అనౌన్స్ మెంట్ మోషన్ పోస్టర్ ను ఆవిష్కరించారు. ఇందులో నిఖిల్ ఓ చెట్టు మీదికి ఎక్కి పడగ విప్పిన ఒక పాము ముందు చేయి చాపి ఉన్నాడు. బ్యాగ్రౌండ్ లో దేవాలయాలను ఎర్రబడిన చంద్రుడిని చూడొచ్చు.

ఇండిపెండెన్స్ వీక్ లో వస్తున్నప్పటికీ.. నిఖిల్ కు సోలో రిలీజ్ దొరకలేదు. ఎందుకంటే 'మాచర్ల నియోజకవర్గం' సినిమా అదే ఆగస్ట్ 12న ప్రేక్షకుల ముందుకు రాబోతోంది. అంటే ఈసారి బాక్సాఫీస్ వద్ద యూత్ స్టార్ నితిన్ తో నిఖిల్ పోటీ పడాల్సి వస్తోంది.

నితిన్ హీరోగా నటించిన 'సంబరం' చిత్రంలో చిన్న క్యారక్టర్ లో నిఖిల్ కనిపించాడు. ఇన్నేళ్ల తర్వాత వీరిద్దరూ బాక్సాఫీస్ వద్ద డీ కొట్టుకోవడం ఆసక్తికరంగా మారింది. అయితే వీరికి అమీర్ ఖాన్ - నాగచైతన్యల నుంచి పోటీ ఎదురు కానుంది.

'లాల్ సింగ్ చడ్డా' సినిమా అదే రోజున పాన్ ఇండియా స్థాయిలో విడుదల కాబోతోంది. తెలుగులో మెగాస్టార్ చిరంజీవి ఈ చిత్రాన్ని సమర్పిస్తుండటం గమనార్హం. మరి ఈ మూడు సినిమాల్లో ఏవేవి విజయం సాధిస్తాయో చూడాలి.

కాగా, 'కార్తికేయ 2' అనేది నిఖిల్ - చందు మొండేటి కాంబోలో వచ్చిన సూపర్ హిట్ 'కార్తికేయ' చిత్రానికి సీక్వెల్. పీపుల్ మీడియా ఫ్యాక్టరీ మరియు అభిషేక్ అగర్వాల్ ఆర్ట్స్ బ్యానర్స్ పై టీజీ విశ్వప్రసాద్ - అభిషేక్ అగర్వాల్ 'కార్తికేయ 2' చిత్రాన్ని నిర్మిస్తున్నారు. వివేక్ కూచిభోట్ల‌ సహ నిర్మాతగా వ్యవహరిస్తున్నారు.

ఇందులో బాలీవుడ్ నటుడు అనుపమ్ ఖేర్ కీలక పాత్ర పోషించగా.. శ్రీనివాసరెడ్డి - ప్రవీణ్ - ఆదిత్యా మీనన్ - తులసి - సత్య - వైవా హర్ష - వెంకట్ తదితరులు ఇతర పాత్రల్లో నటించారు. కాల భైరవ సంగీతం సమకూర్చగా.. కార్తీక్ ఘట్టమనేని సినిమాటోగ్రఫీ నిర్వహించారు.