కృష్ణుడి అనుచరుల దృష్టిని ఆకర్షిస్తోన్న 'కార్తికేయ 2'

నిఖిల్ సిద్ధార్థ్ హీరోగా చందు మొండేటి దర్శకత్వంలో తెరకెక్కుతున్న తాజా చిత్రం ''కార్తికేయ 2''. ఎనిమిదేళ్ళ క్రితం వీరి కాంబోలో వచ్చిన బ్లాక్ బస్టర్ 'కార్తికేయ' ఫ్రాంచైజీలో ఈ సూపర్ నేచురల్ మిస్టికల్ థ్రిల్లర్ రూపొందుతున్న సంగతి తెలిసిందే. పోస్ట్ ప్రొడక్షన్ కార్యక్రమాలు చివరి దశకు చేరుకున్న ఈ మూవీ రిలీజ్ కు రెడీ అవుతోంది.

'కార్తికేయ' సీక్వెల్ గా రూపొందుతున్న సినిమా కావడంతో ''కార్తికేయ 2'' పై భారీ అంచనాలు నెలకొన్నాయి.. దీనికి తగ్గట్టుగానే మొదటి భాగానికి మించిన స్థాయిలో రెండో భాగాన్ని సిద్ధం చేస్తున్నారు. ఈ నేపథ్యంలో ఇటీవల నిఖిల్ బర్త్ డే స్పెషల్ గా వదిన ఫస్ట్ లుక్ మోషన్ పోస్టర్ కు ప్రేక్షకుల నుంచి విశేష స్పందన లభించింది.

'సముద్రం దాచుకున్న అతి పెద్ద రహస్యం ఈ ద్వారకా నగరం' అంటూ నిఖిల్ వాయిస్ తో వచ్చిన ఈ మోషన్ పోస్టర్ ఉత్కంఠకు గురిచేసింది. 'కార్తికేయ 2' అనేది ద్వారకా నగరం మరియు దాని వెనకున్న రహస్యాన్ని కనిపెట్టే ఆసక్తికర కథాంశంతో శ్రీకృష్ణ తత్వంపై రూపొందుతోన్న ఎపిక్ డివోనల్ జెర్నీగా పేర్కొనబడింది.

'కార్తికేయ 2' మోషన్ పోస్టర్ సోషల్ మీడియాలో సంచలనం సృష్టించిందనే చెప్పాలి. అంతేకాదు చందు మొండేటి తెరకెక్కించే ఈ కొత్త యాక్షన్ అడ్వెంచర్... దేశవ్యాప్తంగా ఉన్న లార్డ్ కృష్ణ అనుచరుల దృష్టిని ఆకర్షిస్తోంది. అనేక ఇస్కాన్ దేవాలయాలు స్వచ్ఛందంగా ఈ సినిమాను ప్రమోట్ చేసే అవకాశం ఉందని అంటున్నారు.

ఇటీవల కాలంలో దేవాలయాలు మరియు ఆధ్యాత్మికత నేపథ్యంలో రూపొందిన సినిమాలు విశేష ప్రేక్షదారణ దక్కించుకుంటున్నాయి. ఈ క్రమంలో రాబోతున్న 'కార్తికేయ 2' చిత్రం కూడా అదే కోవకు చెందుతుందని అందరూ భావిస్తున్నారు. ఇక్కడ మరో ప్రత్యేకత ఏంటంటే.. ఈ చిత్రాన్ని పాన్ ఇండియా స్థాయిలో తెలుగు తమిళ మలయాళ కన్నడ హిందీ భాషల్లో సైతం విడుదల చేయబోతున్నారు.

ఇందులో నిఖిల్ సరసన మలయాళ బ్యూటీ అనుపమ పరమేశ్వరన్ హీరోయిన్ గా నటిస్తోంది. ప్రముఖ బాలీవుడ్ నటుడు అనుపమ్ ఖేర్ - శ్రీనివాస్ రెడ్డి కీలక పాత్రలు పోషిస్తున్నారు. కాలభైరవ సంగీతం సమకూరుస్తుండగా.. కార్తీక్ ఘట్టమనేని సినిమాటోగ్రఫీ అందిస్తున్నారు. సాహి సురేష్ ఆర్ట్ డైరెక్టర్ గా వర్క్ చేస్తున్నారు.

పీపుల్ మీడియా ఫ్యాక్టరీ మరియు అభిషేక్ అగర్వాల్ ఆర్ట్స్ బ్యానర్స్ పై టీజీ విశ్వప్రసాద్ - అభిషేక్ అగర్వాల్ సంయుక్తంగా భారీ బడ్జెట్ తో ఈ చిత్రాన్ని నిర్మిస్తున్నారు. వివేక్ కూచిభోట్ల‌ సహ నిర్మాతగా వ్యవహరిస్తున్నారు. 'కార్తికేయ 2' చిత్రాన్ని జూలై 22న ప్రపంచ వ్యాప్తంగా థియేటర్స్ లో విడుదల చేయబోతున్నారు.