విశాల్.. వాట్ ఎ లుక్

కోలీవుడ్ లో వరుస హిట్లతో దూసుకెళ్తున్నాడు తెలుగబ్బాయి విశాల్. ఈ ఏడాది అతను హీరోగా నటించిన ఆంబళ (మగమహారాజు) - పాయుం పులి (జయసూర్య) రెండూ కూడా మంచి విజయం సాధించాయి. ఇప్పుడు ‘కథాకళి’ అనే కొత్త సినిమాను రెడీ చేశాడు నల్లనయ్య. ‘పసంగ’ లాంటి జాతీయ అవార్డు సినిమా తీసిన ‘పాండిరాజ్’ ఈ సినిమాకు దర్శకుడు. రెండు మూడేళ్లుగా సొంత బేనర్ లోనే సినిమాలు చేస్తున్న విశాల్.. ఈ చిత్రాన్ని కూడా తన ‘విశాల్ ఫిలిం ఫ్యాక్టరీ’ బేనర్ మీద స్వయంగా నిర్మించాడు.

‘కథాకళి’ ఫస్ట్ లుక్ పోస్టర్లు నిన్నట్నుంచి సోషల్ మీడియాను షేక్ చేసేస్తున్నాయి. ముందు కేవలం పిడికిలి మాత్రమే ఉన్న పోస్టర్ ఒకటి వదిలాడు విశాల్. అది ‘వావ్’ అనిపించింది. ఆ తర్వాత విశాల్ ముఖాన్ని సగం చూపిస్తూ మరో లుక్ రిలీజైంది. అందులో విశాల్ కళ్లు అగ్నిగోళాల్లా మండిపోతున్నాయి. రెండు లుక్స్ లోనూ ఇంటెన్సిటీ కనిపిస్తోంది. సోషల్ మీడియాలో సెలబ్రెటీలు - అభిమానులు అందరూ కూడా లుక్స్ సూపర్ అనే అంటున్నారు. ఇటీవలే నడిగర్ సంఘం ఎన్నికల్లో విశాల్ అండ్ టీమ్ అద్భుత విజయం సాధించాక వస్తున్న సినిమా కావడంతో దీని మీద మంచి హైప్ నెలకొంది. మామూలుగా పాండిరాజ్ సాఫ్ట్ మూవీస్ చేస్తుంటాడు. ఐతే విశాల్ ఇమేజ్ ను దృష్టిలో ఉంచుకుని పక్కా మాస్ మసాలా మూవీ చేశాడని పోస్టర్లను బట్టే తెలుస్తోంది.