టీజర్ టాక్: ప్రియురాలిపై పగ తీర్చుకునే హీరో

అమ్మాయి నచ్చితే ప్రేమిస్తారు. ప్రేమించిన అమ్మాయి మోసం చేస్తే పగ కూడా తీర్చుకుంటారు. కానీ ఓ అమ్మాయిని ఓ వైపు ప్రేమిస్తూనే మరోవైపు తనపై పగ తీర్చుకోవడం ఎక్కడైనా చూసి ఉంటారా..? ‘కథలో రాజకుమారి’లో కథానాయకుడు ఇదే పని చేయబోతున్నాడు. మరి అందుకు కారణమేంటన్నది మాత్రం తెలియడం లేదు. ఆ మధ్య అందమైన టైటిల్ లోగో.. ఆపై స్టన్నింగ్ ఫస్ట్ లుక్ పోస్టర్ తో జనాల్లో ఆసక్తి రేకెత్తించిన ‘కథలో రాజకుమారి’ ఇప్పుడు ఆహ్లాదకరమైన టీజర్ తో ప్రేక్షకుల ముందుకొచ్చేసింది. నిమిషం నిడివి ఉన్న ఈ టీజర్ చూస్తే చాలా మంచి ఫీలింగ్ కలగడం ఖాయం.

‘‘నాకెన్నో రూపాలు.. నాకెన్నో కోపాలు.. కానీ ఒకటే ప్రేమ.. కానీ అంత ఈజీ కాదు మనల్ని ప్రేమించేవాళ్ల మీద పగ తీర్చుకోవడం’’ అంటూ హీరో నారా రోహిత్ వాయిస్ ఓవర్ తో మొదలయ్యే ‘కథలో రాజకుమారి’ టీజర్ ఆసక్తి రేకెత్తిస్తుంది. టీజర్ ఆద్యంతం అందమైన విజువల్స్ కనువిందుగా అనిపిస్తున్నాయి. బ్యాగ్రౌండ్ స్కోర్ కూడా బాగా కుదిరింది. ప్రేమించిన అమ్మాయిపై పగ తీర్చుకోవడం ఏంటి అనే ఆలోచనే సినిమాపై క్యూరియాసిటీ పెంచేదే. టీజర్లో చాలా వరకు మామూలుగా కనిపించిన నారా రోహిత్.. ఫస్ట్ లుక్ పోస్టర్లో కనిపించిన స్టన్నింగ్ అవతారంలో కూడా ఒక చోట దర్శనమిచ్చాడు. ‘చుట్టాలబ్బాయి’తో తెలుగు ప్రేక్షకులకు పరిచయమైన నమిత ప్రమోద్.. తొలి సినిమాతో పోలిస్తే ఇందులో అందంగా కనిపిస్తోంది. ఇందులో అతిథి పాత్ర చేస్తున్న నాగశౌర్య గుబురు గడ్డంతో కనిపించాడు. ‘సావిత్రి’లో రోహిత్ తో జత కట్టిన తెలుగమ్మాయి నందిత కూడా టీజర్లో తళుక్కుమంది. మహేష్ సూరపనేని దర్శకత్వం వహిస్తున్న ఈ చిత్రం త్వరలోనే ప్రేక్షకుల ముందుకు రానుంది.