ట్రైలర్ టాక్: రాజకుమారి కథ అదిరిందిలే

కథలో రాజకుమారి.. ఈ మధ్య కాలంలో జనాల్లో బాగా ఆసక్తి రేకెత్తిస్తున్న కొత్త సినిమాల్లో ఒకటి. పొయెటిగ్గా ఉండే టైటిల్.. దాని అందమైన డిజైన్.. ఆపై సెన్సేషనల్ మోషన్ పోస్టర్.. తర్వాత ఒక బ్యూటిఫుల్ టీజర్ తో జనాల దృష్టిని ఆకర్షించింది ఈ సినిమా. ఇప్పుడు ఈ సినిమా ట్రైలర్ కూడా అదే స్థాయిలో మెప్పిస్తోంది. ముందుగా అన్నట్లే శనివారం 4 గంటలకు ‘కథలో రాజకుమారి’ థియేట్రికల్ ట్రైలర్ ను లాంచ్ చేసింది చిత్ర బృందం.

సినిమాల్లో విలన్ పాత్రలు వేసే కుర్రాడు.. ఓ సంప్రదాయ కుటుంబానికి చెందిన అందమైన అమ్మాయి మధ్య సాగే సినిమానే ‘కథలో రాజకుమారి’. ముందు నారా రోహిత్ విలన్ క్యారెక్టర్ల పరిచయంతో ట్రైలర్ మొదలుపెట్టారు. ఆ తర్వాత కథానాయికతో రొమాంటిక్ పార్ట్ చూపించారు. తన తండ్రికి హీరోను పరిచయం చేస్తూ.. సినిమాల్లో జూనియర్ ఆర్టిస్ట్ అంటుంది కథానాయిక. సాఫీగా సాగుతున్న వీళ్లిద్దరి బంధం బీటలు వారుతుంది. హీరో ఈ అమ్మాయి జీవితంలోనూ విలన్ అయిపోతాడు. చివరికి మరి వీళ్లిద్దరూ ఎలా కలిశారన్నది కథ.

అందమైన విజువల్స్.. ఆలోచన రేకెత్తించే డైలాగ్స్.. ఆహ్లాదకరమైన సంగీతం.. ఇలా ‘కథలో రాజకుమారి’ ట్రైలర్లో చెప్పుకోవడానికి చాలా విశేషాలే కనిపిస్తున్నాయి. నారా రోహిత్ స్క్రీన్ ప్రెజెన్స్ బాగుంది. హీరోయిన్ నమిత ప్రమోద్ అందంగా కనిపిస్తోంది. నాగశౌర్య లుక్ డిఫరెంటుగా ఉంది. మహేష్ సూరపనేని ఈ చిత్రంతో దర్శకుడిగా పరిచయమవుతున్నాడు. నారా రోహిత్ సమర్పణలో అతడి మిత్రులే ఈ చిత్రాన్ని నిర్మిస్తుండటం విశేషం. జులై నెలాఖర్లో ‘కథలో రాజకుమారి’ ప్రేక్షకుల ముందుకొచ్చే అవకాశముంది.