జాకీచాన్‌ సినిమాలో కత్రిన.. కానీ..

ఇటీవలి కాలంలో హాలీవుడ్‌, బాలీవుడ్‌ కలయికలో సినిమాలొస్తున్న సంగతి తెలిసిందే. ఐశ్వర్యారాయ్‌, ఇర్ఫాన్‌ ఖాన్‌, టబు, ప్రియాంక చోప్రా, నర్గీస్‌ ఫక్రీ వంటి నటీనటులు హాలీవుడ్‌ అవకాశాల్ని అందుకున్నారు. తమవైపు వచ్చిన ఏ అవకాశాన్ని వదులుకోకుండా పనిచేశారు. మునుముందు హాలీవుడ్‌ స్టార్స్‌, బాలీవుడ్‌ స్టార్స్‌ కలిసి నటించే సినిమాల శాతం పెరగనుంది.

ఇప్పటికే కొన్ని హాలీవుడ్‌ సంస్థలు బాలీవుడ్‌ సహా రెజియనల్‌ భాషల్లో సినిమాలు తీసేందుకు ముందుకొస్తున్నాయి. టై అప్‌లతో సినిమాలు తెరకెక్కుతున్నాయి కాబట్టి వీటిలో మన స్టార్లు నటించే ఛాన్సులు పెరుగుతున్నాయి. లేటెస్టుగా హాలీవుడ్‌ యాక్షన్‌ స్టార్‌ జాకీచాన్‌తో కలిసి 'కుంగ్‌ ఫూ యోగా' చిత్రంలో అమీర్‌ఖాన్‌ నటించే అవకాశాలున్నాయని వార్తలొచ్చాయి. అయితే అమీర్‌ దీన్ని ఖండించారు. ఇంతలోనే ఈ చిత్రంలో కత్రినకైఫ్‌ ఓ కీలకపాత్రలో నటించే ఛాన్సుందని చెబుతున్నారు.

కత్రిన ఈ చిత్రంలో చైనీస్‌ యూనివర్శిటీ ప్రొఫెసర్‌ (ఇండియన్‌)గా నటించేందుకు ఆస్కారం ఉందని చెబుతున్నారు. ఇప్పటికే కత్రినను సంప్రదించాం. అట్నుంచి సమాధానం రావాల్సి ఉందని చాన్‌ మేనేజర్‌ చెప్పారు. స్టాన్‌లీ టాంగ్‌ ఈ చిత్రానికి దర్శకత్వం వహిస్తున్నాడు. లండన్‌ బ్యూటీ కత్రినకు ఇది అరుదైన అవకాశం.. వినియోగించుకుంటుందనే అనుకుంటున్నామని అన్నారు.