కౌశల్‌ ఆర్మీతో నానికి అక్కడ కూడా ఇబ్బందే..!

యువ హీరో నాని నేచురల్‌ స్టార్‌ గా గుర్తింపు దక్కించుకుని అందరి హీరోల అభిమానులను తన అభిమానులుగా మార్చేసుకున్నాడు. నాని సినిమా అంటే అందరు చూసేలా ఉంటుందనే ఒక టాక్‌ ఉంది. కాని నాని బిగ్‌ బాస్‌ కు హోస్ట్‌ గా మారిన తర్వాత పరిస్థితి మారిపోయింది. అంతకు ముందు అందరి వాడిగా ఉన్న నాని ఇప్పుడు కొందరికి కంఠుగా మారాడు. బిగ్‌ బాస్‌ గేమ్‌ లో ఉన్న కౌశల్‌ కు బయట ఏ స్థాయిలో ఫ్యాన్‌ ఫాలోయింగ్‌ ఉందో ప్రత్యేకంగా చెప్పనక్కర్లేదు. కౌశల్‌ ను ఒకానొక సమయంలో సీరియస్‌గా ప్రశ్నించినందుకు గాను నానిని కౌశల్‌ ఆర్మీ ఏ స్థాయిలో ట్రోల్‌ చేసిందో ప్రత్యేకంగా చెప్పనక్కర్లేదు. నాని బిగ్‌ బాస్‌ కు అన్‌ ఫిట్‌ అంటూ జాతీయ స్థాయిలో ట్రెండ్‌ చేశారు.

నాని ఆ దెబ్బకు మరెప్పుడు కూడా కౌశల్‌ను విమర్శిస్తూ కామెంట్‌ చేయడం కాని - టార్గెట్‌ చేస్తూ వ్యాఖ్యలు చేయడం కాని చేయలేదు. ఇంటి సభ్యులు కౌశల్‌ ను టార్గెట్‌ చేస్తున్నా కూడా నాని పట్టించుకోవడం లేదు అంటూ కౌశల్‌ ఆర్మీ నానిపై విమర్శలు చేస్తున్నారు. నిజాయితీగా బిగ్‌ బాస్‌ సాగడం లేదని - నాని అందుకు ప్రయత్నించడం లేదు అంటూ విమర్శలు వ్యక్తం అవుతున్నాయి. గత కొన్ని రోజులుగా సోషల్‌ మీడియాలో నానిపై ఫుల్‌ ట్రోల్స్‌ వస్తూనే ఉన్నాయి. ఇటీవల నాని ట్విట్టర్‌లో సుదీర్ఘ వివరణ కూడా ఇచ్చే ప్రయత్నం చేశాడు. అయినా కూడా కౌశల్‌ ఆర్మీ శాంతించలేదు.

తాజాగా ‘శైలజా రెడ్డి అల్లుడు’ చిత్రం ప్రీ రిలీజ్‌ వేడుకలో నాని పాల్గొన్నాడు. ఆ సమయంలో కూడా కొందరు వెనుక నుండి కౌశల్‌ కౌశల్‌ అంటూ గట్టిగా అరవడం మొదలు పెట్టారు. దాంతో మాట్లాడేందుకు సిద్దం అయిన నాని కొద్ది సమయం ఆగిపోయాడు. కౌశల్‌ అంటూ జనాలు మొత్తుకుంటున్న సమయంలో నానికి ఎలా స్పందించాలో కొద్ది సమయం అర్థం కాలేదు. ఆ తర్వాత తేరుకుని థ్యాంక్స్‌ రా బాబు థ్యాంక్స్‌ అంటూ తన స్పీచ్‌ ను మొదలు పెట్టాడు. అక్కినేని వారి వేడుకలో కౌశల్‌ అంటూ నినాదాలు రావడం వచ్చిన అతిథులకు షాక్‌ ఇచ్చింది. నానికి అది మరింత పెద్ద షాక్‌ అని చెప్పుకోవాలి. ముందు ముందు నాని ఇలాంటివి ఎంతగా ఎదుర్కోవాల్సి ఉంటుందో చూడాలి.