టాలీవుడ్‌ పై మ‌ల్లూవుడ్ దాడి!

`మ‌న్యం పులి` చిత్రంతో టాలీవుడ్‌ లోనూ స‌త్తా చాటారు మోహ‌న్‌ లాల్. ఓ ప్ర‌మాద‌క‌ర‌ పులితో ఆడిన తెలివైన మైండ్ గేమ్ - క్రూర‌మృగంపై మ‌నిషి విక్ట‌రీ నేప‌థ్యంలో వ‌చ్చిన ఈ సినిమా ఇక్క‌డా విమ‌ర్శ‌కుల ప్ర‌శంస‌లు అందుకుంది. ఆ త‌ర్వాత `జ‌న‌తా గ్యారేజ్` చిత్రంలో అద్భుత‌మైన పెర్ఫామెన్స్ తో మ‌ల‌యాళ సూప‌ర్‌ స్టార్ మ‌హ‌న‌ల్ లాల్ ఎన్టీఆర్ అభిమానుల‌కు - తెలుగు ప్రేక్ష‌కుల‌కు మ‌రింత‌గా క‌నెక్టయిపోయారు. అందుకే మోహ‌న్ లాల్ న‌టించిన ఓ సినిమా టాలీవుడ్‌ లో రిలీజ‌వుతోంది అంటే అంతో ఇంతో క్యూరియాసిటీ త‌ప్ప‌నిస‌రి.

మోహ‌న్‌ లాల్ - నివిన్ పాళీ ప్ర‌ధాన పాత్ర‌ల్లో న‌టించిన భారీ హిస్టారిక‌ల్‌ చిత్రం `ఖాయం కుల‌మ్ కొచ్చున్ని` ఈ గురువారం(అక్టోబ‌ర్ 11న‌) కేర‌ళ వ్యాప్తంగా అత్యంత భారీగా రిలీజ‌వుతోంది. దాదాపు 351 స్క్రీన్ల‌లో 1700 షోల‌ను ప్ర‌ద‌ర్శిస్తున్నారు. ఇప్ప‌టికే రిలీజైన ట్రైల‌ర్ ఆక‌ట్టుకుంది. 1839 ఏడీ కాలంలో సాగే క‌థ‌తో తెర‌కెక్కిన‌ చిత్ర‌మిది. ఆంగ్లేయుల‌పై నాడు కేర‌ళీయ వీరుల దాడి నేప‌థ్యంలో తెర‌కెక్కింది. 19వ శాతాబ్దానికి చెందిన ఒక దొంగల గ్యాంగ్ (థ‌గ్స్‌) నేపథ్యం ఇంట్రెస్టింగ్ గా ఉంటుంద‌ని చెబుతున్నారు. లాల్ - నివిన్‌ ల మాస్ లుక్‌ లు ఇదివ‌ర‌కూ రిలీజై ఆక‌ట్టుకున్నాయి. ట్రైల‌ర్‌ లోనూ ఆ ఇద్ద‌రి పెర్ఫామెన్స్ ఉత్కంఠ క‌లిగిస్తోంది. ఇక‌పోతే బాలీవుడ్ లోనూ థ‌గ్స్ ఆఫ్ హిందూస్తాన్ బంధిపోటు దొంగ‌ల నేప‌థ్యంలో తెర‌కెక్కి న‌వంబ‌ర్‌ లో రిలీజ‌వుతున్న సంగ‌తి తెలిసిందే. అక్క‌డా సేమ్ ఆంగ్లేయులపై దొంగ‌ల దాడి కాన్సెప్టే.

`ఖాయంకుల‌మ్ కొచ్చున్ని` చిత్రంలో లీడ‌ర్ బ్యూటీ ప్రియా ఆనంద్ క‌థానాయిక‌గా న‌టించింది. ప్రియాకి ఈ భారీ చిత్రం ఏ స్థాయిలో బ్రేకిస్తుందో అన్న‌ది చూడాలి. `మ‌న్యం పులి` బ్లాక్‌ బ‌స్ట‌ర్ విజ‌యం సాధించ‌డంతో
మోహ‌న్‌ లాల్ చిత్రాలన్నీ తెలుగులోనూ రిలీజ్‌ కి వ‌స్తున్నాయి. ఆ కోవ‌లోనే `ఖాయంకుల‌మ్ కొచ్చున్ని` తెలుగు అనువాదం రానుంద‌ని తెలుస్తోంది. అయితే దానికి సంబంధించిన మ‌రింత అధికారిక‌ స‌మాచారం తెలియాల్సి ఉందింకా.