ష‌క‌ల‌క శంక‌ర్ మిష‌న్ ఇంపాజిబుల్‌!

`జ‌బ‌ర్ధ‌స్త్‌` షోతో ఫేమ‌స్ అయ్యాడు ష‌క‌ల‌క శంక‌ర్‌. బుల్లితెర కార్య‌క్ర‌మాల్లో న‌టిస్తూనే - అటుపై వెండితెర అవ‌కాశాలు అందుకున్నాడు. అడుగుపెట్టిన ప్ర‌తిచోటా స‌క్సెస్సే. పెద్ద తెర‌పై చెప్పుకోద‌గ్గ వేషాలే వేసి స‌క్సెస్ సాధించాడు. ఏడాది పొడ‌వునా తీరిక లేనంత బిజీ అయిపోయాడు. అయితే ఇంత‌లోనే ఏమైందో.. శంక‌ర్ ఉన్న‌ట్టుండి `నేనే హీరో` అంటూ `శంభో శంక‌ర‌` సినిమాతో స్ట్రెయిట్ హీరోగా బ‌రిలో దిగిపోయాడు. ఈ సినిమా ప్ర‌మోష‌న్స్‌ లో శ్రీ‌కాకుళం టు హైద‌రాబాద్ త‌న సినీ జ‌ర్నీ గురించి ఎన్నో ఆస‌క్తిక‌ర సంగ‌తుల్ని రివీల్ చేశాడు. తాను హీరో అవుతానంటే ఇండ‌స్ట్రీ పెద్ద‌లు ఎలా అవ‌హేళ‌న చేశారో చెప్పుకొచ్చాడు. త్రివిక్ర‌మ్‌ - దిల్‌ రాజు - అల్లు శిరీష్ లాంటి ప్ర‌ముఖుల‌పై ఊహించ‌ని వాక్భాణాల‌తో దుమ‌దుమ‌లాడాడు.

అంద‌రూ వేషాలిస్తాన‌న్న‌వాళ్లే.. అంతా త‌న‌కు కావాల్సిన‌వాళ్లే .. కానీ రెండేళ్లు ఆగ‌మ‌ని మెలిక‌పెట్టి చంపేశార‌న్నాడు! అంత‌కాలం ఆగితే ఇక త‌న‌కు తిండి ఎవ‌రు పెడ‌తార‌ని - తిండికి లేకే హీరో అయ్యాన‌ని - తాను హీరో అవుతానంటే ఎందుకిన్ని అడ్డంకులు అని ఆవేద‌న వెల్ల‌గ‌క్కాడు. త‌న‌ని హీరోగా నిల‌బెడితే న‌లుగురికి అన్నం పెడ‌తాన‌న్నాడు. అందుకే త‌న పంతం నెగ్గించుకునేందుకు నెల్లూరు పెద్దారెడ్డి లాంటి నిర్మాత‌ని ప‌ట్టేశాడు. నెల్లూరు వాసి నిర్మించిన `శంభో శంక‌ర‌`లో హీరోగా న‌టించాడు. ఈ సినిమా ప్ర‌చారార్భాటంతో ఉత్త‌రాంధ్ర‌లో చ‌క్క‌ని వ‌సూళ్ల‌నే సాధించింద‌న్న టాక్ వినిపించింది. ప‌రిమిత బ‌డ్జెట్‌ తో తెర‌కెక్కి అక్క‌డ వ‌సూళ్లు రాబ‌ట్ట‌డంతో నిర్మాత‌లు సేఫ్ అని ప్ర‌క‌టించారు. ఈ సినిమాతో శంక‌ర్ ఇచ్చిన స‌ర్‌ ప్రైజ్‌ లు మామూలుగా లేవు. అత‌డు ఒక క‌మెడియ‌న్ అయ్యి ఉండి.. సునీల్ - స‌ప్త‌గిరి త‌ర‌హాలో కామెడీ హీరో అవుతాడ‌నుకుంటే - నేరుగా షూట్ ఎట్ సైట్ హీరోలా క‌నిపించి షాకిచ్చాడు. ఆ షాక్ నుంచి తేరుకునే లోగానే మ‌రోసారి పెద్ద షాకిచ్చేందుకు రెడీ అయ్యాడు.

నిన్న‌టిరోజున ష‌క‌ల‌క శంక‌ర్ న‌టించిన రెండో సినిమా `కేడి నం.1` ప్ర‌మోష‌న‌ల్ ఈవెంట్ ఫిలింఛాంబ‌ర్‌ లో జ‌రిగింది. ఛాంబ‌ర్ ప‌రిస‌రాల్లో శంక‌ర్ పోస్ట‌ర్లు - క‌టౌట్లు చూసిన‌వాళ్లంతా ఔరౌరా! అంటూ ముక్కున వేలేసుకున్నారు. ఆ పోస్ట‌ర్ల‌లో అత‌డు `మిష‌న్ ఇంపాజిబుల్` హీరో టామ్ క్రూజ్ రేంజులో భారీ మెషీన్ గ‌న్స్ ప‌ట్టుకుని సిస‌లైన యాక్ష‌న్ కేడీలా క‌నిపించాడు. కుడిచేతి ట్రైసెప్ ఏరియాలో హాలీవుడ్ రిచెస్ట్ హీరో విల్‌ స్మిత్ ప‌చ్చ‌బొట్టు లాంటి ప‌చ్చ‌బొట్టు ఒక‌టి కేక‌లు పెట్టించింది. పైగా ఆ రెబాన్ క‌ళ్ల‌ద్దాలు సూప‌ర్‌ స్టార్‌ ని ఎలివేట్ చేయ‌డంతో.. ఆ గెట‌ప్ ప్ర‌స్తుతం అంత‌ర్జాలంలో నెటిజ‌నుల‌కు ఊహించ‌ని షాకిస్తోంది. ఈ ఫోజు చూశాక శంక‌ర్‌ లోని గ‌ట్స్‌ ని మెచ్చుకోని వారుండ‌రు. అమాయ‌క‌త్వ‌మో.. సూటిగా ఉండే త‌త్వ‌మో కానీ.. తిట్టాల్సిన వాళ్ల‌ను తిట్టేశాడు. ఏకాల్సిన వాళ్ల‌ను ఏకేశాడు. త‌న‌కు అవ‌కాశాలిస్తాం.. వెయిట్ చేయ్‌! అన్న‌వాళ్లంద‌రినీ అప్ప‌ట్లో ఆ ర‌కంగా మీడియా లైవ్‌ లో తొక‌డాలు తీశాడు. ఇప్పుడు త‌న‌కు తానే రామ్‌ చ‌ర‌ణ్ రేంజులో ఎలివేట్ చేసుకునే ప్ర‌య‌త్నం చేస్తున్నాడు. భారీ యాక్ష‌న్ హీరోల‌కే షివ‌రింగ్ ఇస్తున్నాడు ఈ కొత్త లుక్‌ లో. మొత్తానికి శంక‌ర్‌ అన్నంత ప‌నీ చేస్తున్నాడు. ఎవ‌డేమ‌నుకుంటే నాకేటి? అన్న తీరుగా చెల‌రేగిపోతున్నాడు. శంక‌ర్‌ లోని డేరింగ్ యాటిట్యూడ్‌ ని మీడియా మాత్రం ప్ర‌శంసించ‌కుండా ఉండ‌లేక‌పోతోంది. ఆల్ ది బెస్ట్ టు శంక‌ర్ మిష‌న్ ఇంపాజిబుల్‌.. ఎక్స్‌ -కేడి.నం.1.