వర్మను పొగిడేసిన కీరవాణి

ఒకవైపు అక్కినేని నాగార్జునతో సినిమా చేస్తూ.. మరోవైపు రామ్ గోపాల్ వర్మ ‘గాడ్ సెక్స్ అండ్ ట్రూత్’ లాంటి మూవీ తీస్తాడని ఎవ్వరూ అనుకోలేదు. వర్మ ఈ టైంలో ఇలాంటి సినిమా తీయడమే ఆశ్చర్యమంటే దీనికి లెజెండరీ మ్యూజిక్ డైరెక్టర్ కీరవాణి సంగీతాన్నందించడం ఇంకా పెద్ద షాక్. భక్తి రస.. ఆధ్యాత్మిక చిత్రాలకు మ్యూజిక్ చేయడం ద్వారా కీరవాణికి గొప్ప ఇమేజ్ వచ్చింది.

‘బాహుబలి’తో జాతీయ.. అంతర్జాతీయ స్థాయిలో కీరవాణి చాలా మంచి పేరు సంపాదించారు. ట్రెడిషనల్ గా కనిపించే ఆయన ‘జీఎస్టీ’ లాంటి మూవీకి మ్యూజిక్ చేస్తాడని ఎవరూ ఊహించి ఉండరు. ఐతే వర్మ మీద ఉన్న గౌరవం వల్ల కావచ్చు.. ఇమేజ్ ఛట్రంలో ఇరుక్కోకుండా తాను దేనికైనా మ్యూజిక్ చేయగలనని చాటడం కోసం కావచ్చు.. వర్మ చెబుతున్నట్లే ‘జీఎస్టీ’ని ఒక ఉన్నతమైన సినిమాగా భావించడం వల్ల కావచ్చు.. కీరవాణి దీనికి నేపథ్య సంగీతం సమకూర్చాడు.

‘జీఎస్టీ’కి సంబంధించి వర్మను కీరవాణి ట్విట్టర్ ద్వారా తెగ పొగిడేయడం విశేషం. 1991లో వర్మ తనతో రొమాంటిక్ మ్యూజిక్ చేయించాడని.. 1992లో కామెడీ సినిమాకు పని చేయించాడని.. ఇప్పుడు ‘సెక్స్’ మూవీకి తనతో సంగీతం చేయించుకున్నాడని.. తనకు ఇలా విభిన్నమైన సినిమాలకు సంగీతం అందించే అవకాశం ఇచ్చాడని.. ఈ ఏడాది త్వరలోనే హార్రర్.. యాక్షన్ సినిమాలకూ మ్యూజిక్ చేయించే ఛాన్సుందని అన్నాడు కీరవాణి. ఇలా విభిన్నమైన సినిమాలకు పని చేసే అవకాశం కల్పిస్తున్న వర్మలోని మ్యాడ్ డైరెక్టర్ కు హ్యాట్సాఫ్ అని కీరవాణి కితాబివ్వడం విశేషం.