ఆర్ ఆర్ ఆర్ వాయింపు షురు

టాలీవుడ్ లో మోస్ట్ క్రేజీ ప్రాజెక్ట్ గా షూటింగ్ మొదలు కాక ముందు నుంచే హాట్ టాపిక్ గా మారిన ఆర్ఆర్ఆర్ మ్యూజిక్ సిటింగ్స్ ఇవాళ నుంచి ప్రారంభం కానున్నాయి. మొదట సెట్ వేసి కీలక భాగం షూటింగ్ జరిపిన అల్యూమినియం ఫ్యాక్టరీలోనే కీరవాణి వీటికి శ్రీకారం చుట్టబోతున్నారు. ఇది బాహుబలి కన్నా పెద్ద రేంజ్ లో ఉంటుందని ఇటీవలే రాజమౌళి చెప్పిన తరుణంలో అంచనాలు ఇంకా పెరగడం మొదలైంది. కీరవాణి గారి ట్రాక్ రికార్డు చూస్తే ఒక్క రాజమౌళి విషయంలో తప్ప మిగిలిన సినిమాలకు ఏమంత గొప్పగా ఇవ్వలేకపోతున్నారు.

ఎన్టీఆర్ రెండు భాగాలూ  రిజల్ట్ పరంగా ఫెయిల్ అయినా మ్యూజికల్ గా కూడా గొప్ప పేరేమి రాలేదు. ఈ నేపథ్యంలో ఆర్ఆర్ఆర్ కు ఎలాంటి సంగీతం ఇస్తారు అనేది  ఆసక్తికరంగా మారింది. పాటలు ఎన్ని ఉంటాయి అనే క్లారిటీ కూడా ఇంకా రావాల్సి ఉంది. మ్యూజిక్ సిటింగ్స్ సంగతి అలా ఉంచితే ఇందులో జూనియర్ ఎన్టీఆర్ కు ఎన్ని పాటలు రామ్ చరణ్ కు ఎన్ని పాటలు ఉంటాయి అనే చర్చ రావడం సహజం. ఒకరికి ఎక్కువ మరొకరికి తక్కువ లాంటివి రాజమౌళి పొరపాటున కూడా చేయడు.

ఇద్దరి అభిమానుల అంచనాలు పోలికల గురించి అవగాహన ఉన్న వ్యక్తి కాబట్టి బాలన్స్ చేసే ప్రయత్నమైతే గట్టిగానే చేస్తారు. బాహుబలికి అద్భుతమైన అవుట్ ఫుట్ ఇచ్చిన కీరవాణి దీనికి అంతకు మించి ఇస్తాడు అనడంలో సందేహం అక్కర్లేదు. రాజమౌళి మొదటి సినిమా స్టూడెంట్ నెంబర్ వన్ మొదలుకుని ఇప్పటి ఆర్ ఆర్ ఆర్ దాకా రాజమౌళిని కీరవాణి ఎప్పుడూ నిరాశ పరచలేదు. అందుకే మెగా నందమూరి ఫ్యాన్స్ నిశ్చింతగా ఉన్నారు. కోల్కతా షెడ్యూల్ కోసం ఆర్ఆర్ఆర్ యూనిట్ మరికొద్ది రోజుల్లో బయలుదేరనుంది