ఇక ఫరవాలేదు .. కీర్తి సురేశ్ దార్లో పడిపోయినట్టే!

తెలుగు .. తమిళ భాషల్లో కీర్తి సురేశ్ కి మంచి క్రేజ్ ఉంది. అందం .. అభినయం పుష్కలంగా ఉన్న కీర్తి సురేశ్ కి, అదృష్టం కూడా తోడైంది. దాంతో కెరియర్ ఆరంభంలోనే ఆమెకి మంచి మంచి సినిమాలు పడ్డాయి. అయితే స్టార్ డమ్ వచ్చిన తరువాత కీర్తి సురేశ్ కొంచెం తడబడింది. తమిళంలో వరుస హిట్లతో ఉన్నప్పుడు తెలుగులో, ఇక్కడ 'మహానటి' వంటి బ్లాక్ బస్టర్ తరువాత తమిళంలో బిజీ అయింది. అంటే ఎక్కడ ఆమె అవసరం ఉందో అక్కడ ఆమె అందుబాటులో లేకుండా పోయింది. దాంతో కొంత గ్యాప్ వచ్చేసింది .. ముఖ్యంగా తెలుగులో.

'మహానటి' తరువాత కీర్తి సురేశ్ మరో పొరపాటు చేసింది. యువ కథానాయకుల జోడీగా ఆమె ఆటపాటలు చూడాలని కుర్రాళ్లు కోరుకుంటే, ఆమె నాయిక ప్రధానమైన పాత్రలను చేస్తూ వెళ్లింది. పైగా ఆ సినిమాలు ఎంటర్టైన్మెంట్ కి దూరంగా సీరియస్ గా సాగడం మరో మైనస్ గా మారింది. ఇక ఈ సమయంలోనే ఆమె నాజూకుగా మారే ఆలోచన కూడా చేసింది. ఆమెను బొద్దుగా చూడటానికి ఇష్టపడిన అభిమానులను ఇది నిరాశకు గురిచేసింది. ఇలా మంచి క్రేజ్ ఉన్న సమయంలో తొందరపాటు నిర్ణయాలతో కీర్తి సురేశ్ గందరగోళంలో పడిపోయింది.

ప్రస్తుతం కీర్తి సురేశ్ చేస్తున్న సినిమాలు చూస్తుంటే, ఆమె కాస్త దార్లో పడినట్టుగానే కనిపిస్తోంది. మలయాళంలో ఆమె చేసిన 'మరక్కార్' చాలా పెద్ద ప్రాజెక్టు. పైగా ఇది మోహన్ లాల్ కెరియర్లోనే చెప్పుకోదగిన సినిమా. ప్రియదర్శన్ దర్శకత్వం వహించిన ఈ సినిమా, ఆగస్టు 12వ తేదీన ప్రేక్షకుల ముందుకు రానుంది. ఇక తెలుగులో మహేశ్ బాబు సరసన ఆమె చేస్తున్న 'సర్కారువారి పాట'పై కూడా భారీ అంచనాలు ఉన్నాయి. సంక్రాంతికి ఈ సినిమా విడుదల కానుంది.
ఇక తమిళ సినిమా 'సానికాయిధమ్'లో వైవిధ్యభరితమైన పాత్రలో కనిపించనుంది. మే నెలలో ఈ సినిమా థియేటర్లకు రానుంది. ఈ మూడు భాషల్లోని మూడు సినిమాలు ఆమె కెరియర్ కి మంచి హెల్ప్ అయ్యేలానే కనిపిస్తున్నాయి మరి.