'రంగ్ దే' జోడీ రాబట్టే మార్కులెన్నీ?

కథ ఏదైనా ముందుగా హీరోహీరోయిన్ల జోడీ కుదరాలి. తెరపై వాళ్లను చూస్తుంటే వీళ్ల జోడీ భలేగా ఉందని అనుకోవాలి. అప్పుడు ఆ పాత్రలకు ప్రేక్షకులు కనెక్ట్ అవుతారు. జోడీ కుదరకపోతే పాటల్లో దొరికిపోతారు .. ఇంటర్వెల్ లోనే ఆడియన్స్ బయటికిపోతారు. అందువల్లనే నాయకా నాయికలుగా సరైన జోడీని ఎంపిక చేసుకోవడం చాలా ముఖ్యం. అలాంటి జోడీని ఈ నెల 26వ తేదీన విడుదల కానున్న 'రంగ్ దే' సినిమాలో చూడనున్నామనే టాక్ వినిపిస్తోంది. ఈ సినిమాలో నితిన్ జోడీగా కీర్తి సురేశ్ కనిపించనున్న సంగతి తెలిసిందే.

నితిన్ టీనేజ్ లోనే సినిమాల్లోకి వచ్చేశాడు. ఇంతవరకూ ఆయన జోడీగా చాలామంది హీరోయిన్లు సందడి చేశారు. వాళ్లలో ఆయనకి సరైన జోడీగా నిత్యామీనన్ .. రష్మిక మాత్రమే ఎక్కువ మార్కులను సంపాదించుకున్నారు. నితిన్ సరసన నిత్యామీనన్ 'ఇష్క్' .. 'గుండెజారి గల్లంతయ్యిందే' సినిమాలు చేయగా, 'భీష్మ' సినిమాతో రష్మిక ఆకట్టుకుంది. ఇక నితిన్ తాజా చిత్రమైన 'రంగ్ దే'లో కీర్తి సురేశ్ అలరించనుంది. పోస్టర్స్ లో వీళ్లని చూసినవాళ్లంతా జోడీ భలేగా ఉందని చెప్పుకుంటున్నారు. తెరపై వాళ్ల ఆట .. పాట .. ముద్దు .. ముచ్చట చూడటానికి ఆరాటపడుతున్నారు.

ఇంతవరకూ నితిన్ ఆడిపాడిన కథానాయికల జాబితాను పరిశీలిస్తే, 'రంగ్ దే' జోడీనే నెంబర్ వన్ గా నిలిచే అవకాశాలు ఉన్నాయని అంటున్నారు. ఈ జోడీకి నూటికి నూరు మార్కులు పడిపోతాయనే అభిప్రాయాలు వ్యక్తమవుతున్నాయి. ఈ సినిమాలో నితిన్ మరింత హ్యాండ్సమ్ గా కనిపిస్తుంటే, కీర్తి సురేశ్ మరింత గ్లామరస్ గా అనిపిస్తోంది. లుక్స్ పరంగా .. నటన పరంగా ఈ సినిమాకి ఈ జోడీ ప్రధానమైన ఆకర్షణగా నిలిచే అవకాశాలు పుష్కలంగా ఉన్నాయని అంటున్నారు. మరి తెరపై ఈ జోడీ చేసే అందమైన అల్లరి ఏ రేంజ్ లో ఉంటుందో చూడాలి. 'చెక్' తరువాత నితిన్ నుంచి వస్తున్న ఈ సినిమా హిట్ కొట్టవలసిన అవసరం ఆయనకి ఎంతైనా ఉంది. ఇక 'మహానటి' తరువాత తెలుగులో హిట్ అనే మాట వినని కీర్తి సురేశ్ కి, 'రంగ్ దే' సక్సెస్ మరింత ముఖ్యమనే చెప్పాలి.