మెగా మేనల్లుడి జోడీగా కేకులాంటి పిల్ల?

వైష్ణవ్ తేజ్ అదుష్టవంతుడు అని ఇప్పుడు ప్రత్యేకంగా చెప్పకోవలసిన పనిలేదు. మెగాస్టార్ మేనల్లుడు కావడం .. తొలి సినిమాతోనే బాక్సాఫిస్ బద్ధకాన్ని వదిలించివేయడం .. ఇవన్నీ కూడా ఆయన అదృష్టవంతుడిని నిరూపించే విషయాలే. ఇక హీరోయిన్స్ విషయంలో కూడా ఈ పిల్లగాడి సుడి మామూలుగా లేదు. 'ఉప్పెన' సినిమాలో జాలరి కుర్రాడి వేషం కట్టి విసిరిన 'వల'కి కృతి శెట్టి లాంటి పిల్ల పడిందంటే మామూలు విషయం కాదు. ఎడమవైపున గుండెకాయ ఉన్నవాళ్లెవరూ ఇప్పట్లో ఈ పిల్లను మరిచిపోలేరు. ఊహ తెలిసిన తరువాత ఇలాంటి 'ఉప్పెన' రాలేదని అనుకోని కుర్రాళ్లు లేరు.

ఆ సినిమా తరువాత క్రిష్ దర్శకత్వంలో వైష్ణవ్ తేజ్ ఒక సినిమా చేశాడు. గ్రామీణ నేపథ్యంలో ఈ కథ నడుస్తుంది. రకుల్ కథానాయికగా నటించిన ఈ సినిమా విడుదలకి ముస్తాబవుతోంది. ఈ లోగానే వైష్ణవ్ తేజ్ మరో రెండు ప్రాజెక్టులను పట్టాలెక్కించే పనిలో ఉన్నాడు. ఈ రెండూ పెద్ద బ్యానర్లే కావడం విశేషం. ఇందులో ఒక సినిమాలో వైష్ణవ్ జోడీగా 'కేతిక శర్మ'ను తీసుకునే అవకాశాలు ఉన్నాయనే టాక్ ఫిల్మ్ నగర్లో వినిపిస్తోంది. కేతిక అందాల దెబ్బ ఇంకా ఇక్కడి కుర్రాళ్లకు తగల్లేదు. పిల్ల రసగుల్లలా ఉంటుందనీ, మిఠాయి పొట్లంలా ఉంటుందని మాత్రమే వాళ్లకి తెలుసు.

కేతిక శర్మ కథానాయికగా నటించిన తొలి చిత్రం 'రొమాంటిక్' ఇంకా విడుదల కాలేదు. తెరపై ఈ అమ్మాయి చేసిన రొమాన్స్ ను చూడటానికి యువకుల్స్ అంతా కూడా యుద్ధప్రాతిపదికన తయారవుతున్నారు. పసిడి పరువాలతో ఊరిస్తున్న ఈ బ్యూటీ, తొలి సినిమా విడుదల కాకుండానే 'లక్ష్య' సినిమాలో ఛాన్స్ కొట్టేసింది. నాగశౌర్య జంటగా ఈ సినిమాలో కనువిందు చేయనుంది. ఇప్పుడేమో వైష్ణవ్ తేజ్ జోడీగా కూడా అవకాశాన్ని అందుకోనుందని అంటున్నారు. కృతి శెట్టి మాదిరిగానే తొలి సినిమా రిలీజ్ కాకుండానే వరుస అవకాశాలను అందుకుంటున్న ఈ కేకులాంటి పిల్ల, అదే తరహాలో బ్లాక్ బస్టర్ హిట్ తో బోణీ కొడుతుందేమో చూడాలి.