'#KG7' ఫస్ట్ అప్డేట్: ఎన్ఐఏ ఆఫీసర్ గా డైనమిక్ లుక్ లో కార్తికేయ..!

యువ హీరో కార్తికేయ గుమ్మకొండ డిఫరెంట్ సబ్జెక్ట్స్ ఎంపిక చేసుకుంటూ సినిమా సినిమాకి వెరీయేషన్ ఉండేలా చూసుకుంటున్నాడు. ఇటీవలే 'చావు క‌బురు చ‌ల్ల‌గా' సినిమాలో మాస్ పాత్రలో నటించి మెప్పించిన కార్తికేయ.. ఇప్పుడు యాక్షన్ బాట పట్టాడు. శ్రీ చిత్ర మూవీ మేకర్స్ బ్యానర్ లో ప్రస్తుతం నటిస్తున్న యాక్షన్ ఎంటర్టైనర్ లో కార్తికేయ ఎన్ఐఏ ఆఫీసర్ గా కనిపించనున్నాడు. ఇందులో యంగ్ బ్యూటీ తాన్య రవిచంద్రన్ హీరోయిన్ గా నటిస్తోంది. కొత్త దర్శకుడు శ్రీ సరిపల్లి ఈ చిత్రాన్ని తెరకెక్కిస్తున్నారు. తాజాగా ఈ చిత్రానికి సంబంధించిన కాన్సెప్ట్ వీడియోని చిత్ర యూనిట్ విడుదల చేసింది.

కార్తికేయ నేషనల్ ఇన్వెస్టిగేటివ్ ఆఫీసర్ గా డైనమిక్ లుక్ లో కనిపిస్తున్నాడు. చేతిలో గన్ పట్టుకొని ఈ సినిమా ఇతివృత్తానికి తగ్గట్టు అతని ప్రవర్తన - బాడీ లాంగ్వేజ్ ఉన్నాయి. కరోనా కారణంగా వాయిదా పడుతూ వచ్చిన షూటింగ్ తిరిగి ప్రారంభిస్తున్నట్లు మేకర్స్ వెల్లడించారు. ఇది కార్తికేయ నటిస్తున్న 7వ సినిమా. త్వరలోనే ఈ మూవీ టైటిల్ ని అనౌన్స్ చేయనున్నట్లు చిత్ర బృందం తెలిపింది. ఈ చిత్రంలో సాయి కుమార్ - తనికెళ్ళ భరణి - సుధాకర్ కోమాకుల - పశుపతి ఇతర కీలక పాత్రల్లో నటించనున్నారు. ప్రశాంత్.ఆర్.విహారి సంగీతం సమక్కూరుస్తున్న ఈ చిత్రానికి పి.సి.మౌళి సినిమాటోగ్రాఫర్ గా వ్యవహరిస్తున్నాడు. టి. ఆదిరెడ్డి సమర్పణలో 88 రామారెడ్డి '#KG7' చిత్రాన్ని నిర్మిస్తున్నారు.