బన్నీతో చర్చలు జరిపిన కేజీఎఫ్ డైరెక్టర్.. అందుకేనా??

2018లో పాన్ ఇండియా మూవీ 'కేజీఎఫ్ చాప్టర్ 1' విడుదలైన తర్వాత కేజిఎఫ్ దర్శకుడు ప్రశాంత్ నీల్ సినీపరిశ్రమలో పాన్ ఇండియా డైరెక్టర్లలో ఒకరుగా పాపులర్ అయ్యాడు. గతేడాది కేజీఎఫ్ చాప్టర్ 2 ఫినిష్ చేసి ప్రస్తుతం డార్లింగ్ ప్రభాస్ తో సలార్ సినిమా రూపొందిస్తున్నాడు. గతనెల సలార్ ఫస్ట్ షెడ్యూల్ కూడా పూర్తి చేసాడు ప్రశాంత్. అయితే తాజాగా ప్రశాంత్ హైదరాబాద్ లో మెరిసి వార్తల్లో నిలిచాడు. అదికూడా స్టైలిష్ స్టార్ అల్లు అర్జున్ ను కలిసి మరింత సస్పెన్స్ క్రియేట్ చేసాడు. ఈ స్టార్ డైరెక్టర్ అల్లు అర్జున్‌ను హైదరాబాద్‌లోని గీతా ఆర్ట్స్ కార్యాలయంలో కలిశాడు. అయితే ప్రశాంత్ అర్జున్‌తో రాబోయే చిత్రం కోసం చర్చలు జరుపుతున్నాడని.. వీరిద్దరూ త్వరలో మరో క్రేజీ సినిమా కోసం జతకడతారని ఊహాగానాలు వ్యక్తం అవుతున్నాయి.

కేజీఎఫ్ డైరెక్టర్ బన్నీతో కొత్త స్క్రిప్ట్ గురించి చర్చించినట్లు సినీవర్గాలు మాట్లాడుకుంటున్నాయి. అయితే స్టైలిష్ స్టార్‌ను కలవడానికి ముందు వీరి ఫోటోలు, వీడియోలు వేర్వేరు సోషల్ మీడియా ప్లాట్‌ ఫామ్‌లలో వైరల్ అయ్యాయి. బన్నీ పూర్తిగా స్టైలిష్ బ్లాక్ డ్రెస్సులో కనిపించాడు. అలాగే తనను చూసేందుకు వచ్చిన అభిమానులను పలకరించాడు. తనను చూడటానికి ఓపికతో ఆఫీసు వద్ద ఉన్నందుకు అభిమానులకు కృతజ్ఞతలు తెలిపాడు బన్నీ. ఆ తర్వాత సలార్ దర్శకుడిని కలవడానికి ఆఫీసు లోపలికి వెళ్ళాడు. ప్రస్తుతం ప్రశాంత్ నుండి ఎంతో ఆసక్తిగా రెండేళ్ల నుండి ఎదురుచూస్తున్న కెజిఎఫ్ చాప్టర్ 2 మూవీ.. ఈ ఏడాది జూలై 16న విడుదల కానుంది. రాకీభాయ్ పాత్రలో రాకింగ్ స్టార్ యష్, ప్రధాన ప్రత్యర్థిగా బాలీవుడ్ నటుడు సంజయ్ దత్, రమీకా సేన్ పాత్రలో రవీనా టాండన్ తదితరులు ఈ సినిమాలో నటించారు. పాన్ ఇండియా సినిమాగా మల్టీలాంగ్వేజెస్ లో కేజీఎఫ్ రిలీజ్ అవ్వనుంది. మరి బన్నీ ప్రశాంత్ త్వరలో ఏదైనా తీపికబురు చెబుతారేమో అని ఫ్యాన్స్ వెయిట్ చేస్తున్నారు.