కెజిఎఫ్ దర్శకుడి నాలుగో సినిమా ఫిక్స్?

చాలా పరిమితమైన మార్కెట్ ఉండే కన్నడ సినిమా స్థాయిని ఎన్నో రెట్లు పెంచి హిందీ డబ్బింగ్ వెర్షన్ నుంచి సైతం కోట్ల రూపాయల వసూళ్లు వచ్చేలా చేసిన కెజిఎఫ్ దర్శకుడు ప్రశాంత్ నీల్ మీద మనవాళ్ళకే కాదు బాలీవుడ్ ప్రొడ్యూసర్ల కన్ను కూడా గట్టిగానే ఉంది. ప్రస్తుతం కెజిఎఫ్ చాప్టర్ 2 ఎండింగ్ మీదే ఫోకస్ పెట్టిన ప్రశాంత్ నీల్ తో మన తెలుగు నిర్మాతలు కూడా రెగ్యులర్ టచ్ లో ఉన్నారట.

ముఖ్యంగా దిల్ రాజు ఆల్మోస్ట్ ప్రశాంత్ తో నెక్స్ట్ ప్రాజెక్ట్ చేసేలా ఓకే చేయించుకున్నాడని ఫ్రెష్ అప్ డేట్. ఇది నిజమా కదా అని నిర్ధారించడానికి టైం పడుతుంది కానీ లోలోపల మాట తీసుకోవడం లాంటివి జరిగాయట. ప్రశాంత్ కొన్ని లైన్స్ కూడా వినిపించాడని కెజిఎఫ్ 2 అయ్యాక డీటైల్డ్ గా డిస్కస్ చేస్తానని చెప్పాడట

ఐదేళ్ల కెరీర్ లో ప్రశాంత్ ఇప్పటిదాకా కేవలం మూడు సినిమాలు మాత్రమే తీశాడు. మొదటిది 2014లో వచ్చిన ఉగ్రం. మాఫియా బ్యాక్ డ్రాప్ లో శ్రీమురళి హీరోగా రూపొందిన ఆ మూవీ కమర్షియల్ గా ఘన విజయం సొంతం చేసుకుంది. నాలుగేళ్లు గ్యాప్ ఇచ్చి 2018లో కెజిఎఫ్ తో వచ్చి సాలిడ్ బ్లాక్ బస్టర్ కొట్టేశాడు.

కెజిఎఫ్ 2 మూడో మూవీ. ఇప్పుడు దిల్ రాజు కనక ఓకే చేయించుకుంటే నాలుగో సినిమా తెలుగు కన్నడలో రూపొందే ద్విభాషా చిత్రం అవుతుంది. అయితే జానర్ ఏంటి ఈసారి ఏ బ్యాక్ డ్రాప్ తీసుకోబోతున్నాడు లాంటి వివరాలేవీ తెలిసే ఛాన్స్ లేదు. వచ్చే ఏడాది కెజిఎఫ్ 2 రిలీజయ్యాక దీని గురించిన సమాచారం బయటికి వస్తుంది. అప్పటిదాకా వెయిట్ చేయాల్సిందే