ఖైదీ మూడో సింగిల్.. ముహూర్తం ఫిక్స్

చూస్తుంటే ఒకేసారి ఆడియో అంతా రిలీజ్ చేయకుండా నాలుగు రోజులకోసారి ఒక్కో పాటను విడుదల చేయాలని మెగాస్టార్ కోసం పనిచేస్తున్న మెగా టీమ్ ఫిక్సయినట్లుంది. ఆల్రెడీ అమ్మడు లెట్స్ డు కుమ్ముడు అంటూ కుమ్మేస్తున్న ఖైదీ.. తరువాత సుందరితో దూసుకొచ్చాడు. ఇప్పుడు కొత్తగా మరో పాటతో రావడానికి సర్వంసిద్దం చేసుకున్నాడు.

డిసెంబర్ 28న ''ఖైదీ నెం 150'' నుండి దేవిశ్రీ ప్రసాద్ కంపోజ్ చేసిన ''యు అండ్ మీ'' అనే కొత్త పాట విడుదలవుతోంది. ఇప్పటికే ఈ సినిమా నుండి టీజర్ తరువాత రెండు పాటలు విడుదలై ఫ్యాన్స్ ను బాగానే అలరిస్తున్నాయి. అయితే డిసెంబర్ 25న మొత్తంగా ఆడియో అంతా రిలీజ్ అయిపోతుంది అనుకుంటే.. ఖైదీ టీమ్ మాత్రం.. జనవరి 4న ప్రీ-రిలీజ్ ఈవెంట్ వరకు ఈ పాటల విడుదల కార్యక్రమాన్ని సాగదీసినట్లున్నారు. పైగా లిరిక్స్ తో కూడిన గ్రాఫిక్స్ వీడియోను రిలీజ్ చేయడం వలన.. జనాలకు కూడా ఈ పాటలను వినడమే కాదు చూడాలని ఆతృత పెరిగిపోతోంది.

వివి వినాయక్ డైరక్షన్లో రూపొందిన ఖైదీ నెం 150 సినిమాలో కాజల్ అగర్వాల్ హీరోయిన్ గా నటిస్తున్న సంగతి తెలిసిందే. ఇప్పటివరకు రిలీజైన ప్రకటించిన పాటలన్నీ కూడా లీడ్ పెయిర్ మీద వచ్చేవి. ఇంతకీ లక్ష్మీ రాయ్ తో వచ్చే ఆ ఐటెం సాంగును ఎలా కంపోజ్ చేశాడో దేవిశ్రీ.. దాని కోసం మాస్ ఫ్యాన్స్ వెయిటింగ్ ఇక్కడ. ఈలోపు 3వ పాట విడుదల ముహూర్తం ఎనౌన్స్ చేస్తూ కొత్త పోస్టర్ ఒకటి రిలీజ్ చేశారుగా.. ఈ పోస్టర్లో చిరు ఇచ్చే కిక్ తో సరిపెట్టుకోవాల్సిందే.

Like Us on Facebook : https://www.facebook.com/Tupakidotcom/