మాకూ ఎమోష‌న్స్ ఉంటాయి.. చూసి మాట్లాడాలి!

అందాల క‌థానాయిక‌ కియారా అద్వానీ ఇటీవ‌లి కాలంలో ఏదో ఒక వివాదాస్ప‌ద టాపిక్ తో మీడియాలో హైలైట్ అవుతోన్న సంగ‌తి తెలిసిందే. కొద్దిరోజులుగా కియ‌రాపై పాజిటివ్ వార్త‌ల‌క‌న్నా నెగిటివ్ వార్త‌లే ఎక్కువ‌గా వైర‌ల్ అవుతున్నాయి. వాటిని అంతే సున్నితంగా ఖండిస్తూ కౌంట‌ర్లు వేస్తోంది. కియారాని నెటిజ‌నులు ఓ రేంజ్ లో ట్రోల్ చేస్తున్నారు. నిత్యం ఏదో కామెంట్ వినాల్సొస్తోంది. అందులో కొన్ని కామెంట్లు మ‌న‌సును నొప్పించేవి ఉన్నాయి. కార‌ణం ఏదైనా ఇలాంటి వాటిని ఎంత మాత్రం ప‌ట్టించుకోన‌ని తాజాగా కియారా వెల్ల‌డించింది.

బిజీ లైఫ్ లో కామెంట్లు చ‌దివేంత ఓపిక గానీ.. ఆస‌క్తి గానీ త‌న‌కి లేవ‌ని తెలిపింది. అయితే ఇంట్లో అమ్మానాన్న మాత్రం ప్రతీది చ‌దువుతార‌ని ఎలాంటి వార్త‌నైనా బ్యాలెన్స్ డ్ గానే తీసుకుంటార‌ని...నెగిటివ్ వార్త‌లొచ్చినంత మాత్రాన ఏదో జ‌రిగిపోతుంద‌ని త‌ల్లిదండ్రులు కంగారు ప‌డ‌ర‌ని తెలిపింది. వాటిలో ఏవైనా మంచి విష‌యాల‌ను త‌న దృష్టికి తెస్తార‌ని... వాటిని మాత్రం నెమ‌రు వేసుకుంటే మ‌న‌సుకు ఎంతో హాయిగా ఉంటుంద‌ని తెలిపింది. అయితే తాము కూడా మ‌నుషులేమ‌న‌ని త‌మ‌కి ఎమోష‌న్స్ ఉంటాయ‌న్న విష‌యాన్ని గుర్తుంచుకోవాల‌ని చుర‌క‌లు అంటించింది. ఒక‌రి గురించి ఎదుటివారు మాట్లాడిన‌ప్పుడు క‌చ్చితంగా గౌర‌వం ఇచ్చి పుచ్చుకునేలా ఉండాల‌ని.. ఇలాంటివాటిలో జాగ్ర‌త్త‌గా ఉంటే ఇంకా బాగుంటుంద‌ని సున్నితంగా హెచ్చ‌రించింది.

సినిమా వాళ్లు కూడా అంద‌రిలాగే మ‌నుషులేన‌న్న విష‌యాన్ని గుర్తుపెట్టుకోవాల‌ని అన్నారు. ఈ లైఫ్ లో ఎంత బిజీగా ఉన్నా ఓ కామ‌న్ గాళ్ లా గ‌డ‌పాల‌ని ఉంటుంద‌ని కియారా మ‌న‌సులో మాట‌ల్ని ఒక్కొక్క‌టిగా బ‌య‌ట పెట్టింది. ఇటీవ‌లే కియారా `షేర్షా` సినిమాతో మ‌రో స‌క్సెస్ ని ఖాతాలో వేసుకున్న సంగ‌తి తెలిసిందే. `క‌బీర్ సింగ్`.. `గుడ్ న్యూజ్` చిత్రాల‌తో వ‌రుస స‌క్సెస్ లు అందుకుంటుంది. అదే వేవ్ లో షేర్షా కూడా బ్లాక్ బ‌స్ట‌ర్ అయింది. కియారా క్రేజ్ ఇప్పుడు బాలీవుడ్ లో రెట్టింపు అయింది. అక్క‌డ వ‌రుస చిత్రాల్లో న‌టిస్తూ కియ‌రా బిజీగా ఉంది. అలాగే మెగా ప‌వ‌ర్ స్టార్ రామ్ చ‌ర‌ణ్ 15వ చిత్రంలో హీరోయిన్ గా న‌టిస్తోంది. ఈ చిత్రానికి శంక‌ర్ ద‌ర్శ‌క‌త్వం వ‌హిస్తున్నారు.

విక్ర‌మ్ బాత్రా బ‌యోపిక్ తో హిట్టు

కియ‌రా అద్వాణీ బాలీవుడ్ కెరీర్ ఒక హిట్టు ఒక ఫ్లాపు అన్న‌ట్టుగా సాగుతోంది. ఇంత‌కుముందు అక్ష‌య్ స‌ర‌స‌న ఓ ఫ్లాప్ అందుకున్న ఈ భామ ఇప్పుడు సిద్ధార్థ్ మ‌ల్హోత్రా స‌ర‌స‌న న‌టించిన షేర్ షాతో హిట్టందుకుంది. స్టార్ హీరో అక్ష‌య్ కుమార్ స‌ర‌స‌న కాంచ‌న రీమేక్ ల‌క్ష్మీ బాంబ్ లో న‌టించినా అది హిట్ట‌వ్వ‌లేదు. లారెన్స్ ద‌ర్శ‌క‌త్వంలో తెర‌కెక్కిన ఈ మూవీ ఆశించిన రేంజుకు చేర‌లేదు. సిద్ధార్థ్ మ‌ల్హోత్రా క‌థానాయ‌కుడిగా తెర‌కెక్కిన షేర్ షా లో త‌న పాత్ర ఆక‌ట్టుకుంది. ఈ చిత్రానికి తమిళ స్టార్ డైరెక్ట‌ర్ విష్ణు వ‌ర్ధ‌న్ ద‌ర్శ‌క‌త్వం వ‌హించ‌గా ఇటీవ‌ల ఓటీటీలో రిలీజైంది. ప్రఖ్యాత ద‌ర్శ‌క‌నిర్మాత క‌ర‌ణ్ జోహార్ ప‌లువురు భాగ‌స్వాముల‌తో క‌లిసి ఈ చిత్రాన్ని నిర్మించారు.

కార్గిల్ యుద్ధంలో పాకిస్తాన్ సైన్యంతో విరోచితంగా పోరాడి అమ‌రుడైన విక్ర‌మ్ బాత్రా జీవిత‌క‌థ‌తో ఈ చిత్రం తెర‌కెక్కింది. 7 జూలై 1999లో యుద్ధంలో విక్ర‌మ్ బాత్రా అమ‌ర‌వీరుడ‌య్యారు. 24 వ‌య‌సుకే మ‌ర‌ణించిన ఈ వీరుడికి ప‌ర‌మ వీర చ‌క్ర బిరుదును ఇచ్చి భార‌త ప్ర‌భుత్వం గౌర‌వించింది. షేర్ షా అనేది విక్ర‌మ్ బాత్రా నిక్ నేమ్. అమెజాన్ ప్రైమ్ వీడియోస్ లో విడుద‌లైన ఈ చిత్రానికి క్రిటిక్స్ నుంచి ప్ర‌శంస‌లు ద‌క్కాయి. ఇది నంబ‌ర్ 1 ట్రెండింగ్ మూవీ అంటూ కియరా ట్విట్ట‌ర్ లో ప్ర‌చారం హోరెత్తిస్తోంది.