'కిన్నెర' ప్రోమో: 'శేఖర్' కోసం అనూప్ స్వరపరిచిన బ్యూటిఫుల్ మెలోడీ

యాంగ్రీ మ్యాన్ రాజశేఖర్ ప్రధాన పాత్రలో నటించిన తాజా చిత్రం ''శేఖర్''. 'మ్యాన్ విత్ ది స్కార్' (మచ్చల మనిషి) అనేది దీనికి ట్యాగ్ లైన్. జీవిత రాజశేఖర్ దర్శకత్వంలో తెరకెక్కిన ఈ సినిమాలో వీరి పెద్ద కుమార్తె శివాని కీలక పాత్ర పోషించింది. తల్లి డైరెక్షన్ లో శివాని తన తండ్రితో తొలిసారిగా కలిసి నటిస్తుండటంతో ఈ సినిమాపై అందరిలో ఆసక్తి నెలకొంది.

ఇప్పటికే విడుదలైన ''శేఖర్'' ఫస్ట్ లుక్ - మోషన్ పోస్టర్ - ఫస్ట్ గ్లింప్స్ మంచి స్పందన తెచ్చుకున్నాయి. అలానే 'లవ్ గంటే మోగిందంట' అనే పాట కూడా ఆకట్టుకుంది. ఈ క్రమంలో 'కిన్నెర' అనే సెకండ్ సింగిల్ ని రిలీజ్ చేయడానికి మేకర్స్ సన్నాహాలు చేస్తున్నారు. ఈ మేరకు తాజాగా సాంగ్ ప్రోమోని వదిలారు.

'ఓ సన్నజాజి తీగలా అల్లుకోవే నన్నిలా కిన్నెరా.. ఓ కిన్నెరా.. సంకురాత్రి పంటలా పంచుకోవే నన్నిలా.. కిన్నెరా.. ఓ కిన్నెరా..' అంటూ సాగిన ఈ మెలోడీ శ్రోతలను విశేషంగా అలరిస్తోంది. రాజశేఖర్ - హీరోయిన్ ముస్కాన్ మీద చిత్రీకరించిన ఈ పాట విజువల్ గా కూడా బాగుంది.

అనూప్ రూబెన్స్ స్వరపరిచిన ఈ బ్యూటిఫుల్ మెలోడీని యువ గాయకుడు అర్మాన్ మాలిక్ తనదైన శైలిలో ఆలపించారు. లిరిసిస్ట్ అనంత్ శ్రీరామ్ సాహిత్యం రాశారు. మల్లిఖార్జున నారగాని సినిమాటోగ్రఫీ అందించగా.. గ్యారీ బీహెచ్ ఎడిటింగ్ వర్క్ చేశారు. 'కిన్నెర' పూర్తి పాటను రేపు శుక్రవారం ఉదయం 10 గంటలకు విడుదల చేయనున్నారు.

''శేఖర్'' రాజశేఖర్ కెరీర్ లో 91వ చిత్రం. ఇది మలయాళ సూపర్ హిట్ 'జోసెఫ్' మూవీకి తెలుగు రీమేక్ గా తెరకెక్కింది. ఈ ఇన్వెస్టిగేటివ్ థ్రిల్లర్ లో సీనియర్ హీరో సరికొత్త గెటప్ లో కనిపించనున్నారు. ఆత్మీయ రాజన్ - అభినవ్ గోమటం - కన్నడ కిషోర్ - సమీర్ - భరణి - రవివర్మ - శ్రవణ్ రాఘవేంద్ర తదితరులు ఇతర పాత్రలు పోషించారు.

వంకాయలపాటి మురళీ కృష్ణ సమర్పణలో పెగాసస్ సినీ కార్పొరేషన్ - సుధాకర్ ఇంపెక్స్ ఐపియల్ - త్రిపురా క్రియేషన్స్ - టారాస్ సంస్థలు సంయుక్తంగా ఈ చిత్రాన్ని నిర్మిస్తున్నాయి. బీరం సుధాకర్ రెడ్డి - శివాని రాజశేఖర్ - శివాత్మిక రాజశేఖర్ - బొగ్గారం వెంకట శ్రీనివాస్ నిర్మాతలుగా వ్యవహరిస్తున్నారు. లక్ష్మీ భూపాల ఈ సినిమాకు రచనా సహకారం అందించారు. ఇప్పటికే అన్ని కార్యక్రమాలు పూర్తి చేసుకున్న ''శేఖర్'' చిత్రాన్ని త్వరలో విడుదల చేయనున్నారు.