ఫస్ట్ లుక్: 'నేను మీకు బాగా కావాల్సినవాడిని' అంటున్న యువ హీరో..!

యంగ్ హీరో కిరణ్ అబ్బవరం వరుస సినిమాలను లైన్ లో పెడుతూ ఫుల్ జోష్ లో ఉన్నాడు. ‘రాజావారు రాణిగారు’ సినిమాతో హీరోగా పరిచయమైన కిరణ్.. గతేడాది ‘SR కల్యాణ మండపం’ చిత్రంతో కమర్షియల్ సక్సెస్ అందుకున్నాడు. ఇప్పటికే ‘సమ్మతమే’ సినిమాని పూర్తి చేసిన యువ కథానాయకుడు.. 'స్టెబాస్టియన్' చిత్రాన్ని రిలీజ్ కు రెడీ చేసారు. ఈ క్రమంలో తాజాగా కిరణ్ నటించిన కొత్త సినిమా టైటిల్ మరియు ఫస్ట్ లుక్ పోస్టర్ ని బుధవారం ఉదయం మేకర్స్ లాంచ్ చేశారు.

కిరణ్ అబ్బవరం హీరోగా నటిస్తున్న 5వ సినిమాకు ''నేను మీకు బాగా కావాల్సినవాడిని'' అనే ఆసక్తికరమైన టైటిల్ ను ఖరారు చేసినట్లు చిత్ర బృందం తెలిపింది. ఈ సందర్భంగా వదిలిన కిరణ్ ఫస్ట్ లుక్ పోస్టర్ ఆకట్టుకుంటోంది. కూలింగ్ గ్లాసెస్ పెట్టుకొని షర్ట్ మీద షర్ట్ ధరించి ఉన్న యువ హీరోని చూస్తుంటే.. ఇందులో మాస్ పాత్రలో కనిపించనున్నట్లు తెలుస్తోంది.

'నేను మీకు బాగా కావాల్సినవాడిని' సినిమాతో కార్తీక్ శంక‌ర్ అనే నూత‌న దర్శకుడు ఇండస్ట్రీకి పరిచయం అవుతున్నాడు. ఈ చిత్రంతో దివంగత సీనియర్ దర్శకుడు కోడి రామకృష్ణ పెద్ద కుమార్తె కోడి దివ్య దీప్తి నిర్మాతగా మారుతున్నారు. కోడి దివ్య ఎంటర్టైన్మెంట్స్ అనే నిర్మాణ సంస్థను స్థాపించి కోడి రామకృష్ణ సమర్పణలో ప్రొడక్షన్ నెం.1 గా ఈ సినిమాని రూపొందిస్తున్నారు.

ఇందులో కిరణ్ సరసన సంజన ఆనంద్ హీరోయిన్ గా నటిస్తోంది. సంగీత బ్రహ్మ మణిశర్మ ఈ సినిమాకి మ్యూజిక్ అందిస్తున్నారు. రాజ్ కె నల్లి సినిమాటోగ్రఫీ అందిస్తుండగా.. ప్రవీణ్ పూడి ఎడిటింగ్ వర్క్ చేస్తున్నారు. భాస్కర భట్ల సినిమాలోని పాటలను రాస్తున్నారు. త్వరలోనే 'నేను మీకు బాగా కావాల్సినవాడిని' చిత్రానికి సంబంధించిన నటీనటులు తదితర వివరాలను వెల్లడించనున్నారు.

ఇకపోతే గీతా ఆర్ట్స్ 2 పిక్చర్స్ బ్యానర్ లో 'వినరో భాగ్యము విష్ణు కథ' అనే సినిమాలో నటిస్తున్నాడు కిరణ్ అబ్బవరం. అలానే మైత్రీ మూవీ మేకర్స్ మరియు క్లాప్ ఎంటర్టైన్మెంట్స్ సంస్థలు సంయుక్తంగా యువ హీరోతో ఓ మూవీ చేస్తున్నారు. విభిన్నమైన కథలను ఎంచుకుంటూ ప్రేక్షకులను అలరించడానికి ప్రయత్నిస్తున్న కిరణ్.. ఇప్పుడు 'నేను మీకు బాగా కావాల్సినవాడిని' సినిమాతో ఎలాంటి గుర్తింపు తెచ్చుకుంటారో చూడాలి.