సార‌థి స్టూడియోస్ లో బాగా కావాల్సిన‌వాడు!

కిరణ్ అబ్బవరం ప్రధాన పాత్రలో నటించిన చిత్రం `నేను మీకు బాగా కావాల్సినవాడిని`. శ్రీధర్ గాదె దర్శకత్వం వహిస్తున్నారు.ఈ సినిమా ఫ్యామిలీ యాక్షన్ డ్రామా క‌థాంశంతో తెర‌కెక్కుతోంది. ఇప్ప‌టికే రిలీజైన ఫస్ట్ లుక్ పోస్టర్ ఆక‌ట్టుకుంది. పోస్టర్ లో కిరణ్ అబ్బవం మాస్ లుక్ లో కనిపించాడు. ఈ చిత్రాన్ని ప్రముఖ దర్శకుడు కోడి రామకృష్ణ కుమార్తె కోడి దివ్య నిర్మిస్తున్నారు. మణిశర్మ సంగీతం సమకూరుస్తుండ‌గా.. రాజ్ కె నల్లి సినిమాటోగ్రఫీ అందిస్తోంది. ప్రవీణ్ పూడి ఎడిటింగ్ వ‌ర్క్ అందిస్తున్నారు.

ఇప్ప‌టికే ఈ సినిమా చిత్రీక‌ర‌ణ శ‌ర‌వేగంగా పూర్త‌వుతోంది. నిర్మాత‌లు రిలీజ్ తేదీని సైతం లాక్ చేసిన సంగ‌తి తెలిసిందే. సెప్టెంబ‌ర్ 9 డెడ్ లైన్ ప్ర‌కారం సినిమాని రిలీజ్ చేయాల్సి ఉంది. అయితే ఇటీవ‌ల టాలీవుడ్ లో షూటింగులు నిలిపివేయ‌డంతో ప‌లు చిత్రాలు షూటింగులు నిలిచిపోయాయి. బంద్ తో సంబంధం లేకుండా `నేను మీకు బాగా కావాల్సినవాడిని` చిత్రీక‌ర‌ణ సార‌థి స్టూడియోస్ లో పూర్తి చేస్తున్నార‌ని టాక్ వినిపిస్తోంది. ఇప్ప‌టికే రిలీజ్ తేదీ ఫిక్స్ చేసుకుని విడుద‌ల స‌న్నాహ‌కాల్లో ఉన్నవారికి నిర్మాత‌ల మండ‌లి - నిర్మాత‌ల గిల్డ్ నుంచి కొంత వెసులుబాటు ఉంద‌ని భావించాల్సి ఉంటుంది.

కిరణ్ అబ్బవరం `రాజావారు రాణిగారు` చిత్రంతో టాలీవుడ్ లోకి ప్రవేశించారు. `SR కళ్యాణ మండపం` చిత్రంతో పాపులర్ అయ్యారు. ప్ర‌స్తుతం వ‌రుస చిత్రాల‌తో బిజీ అయిన సంగ‌తి తెలిసిందే. విన‌రో భాగ్య‌ము విష్ణు క‌థ‌- మీట‌ర్- రూల్స్ రాంజ‌న్ లాంటి చిత్రాల్లో న‌టిస్తున్నాడు. మీట‌ర్ ఫ‌స్ట్ లుక్ కి చ‌క్క‌ని స్పంద‌న వ‌చ్చింది.