రెడ్ రీమేక్ కాదు.. లైన్ మాత్రమే: డైరెక్టర్ కిషోర్

టాలీవుడ్ యువ కథనాయకుడు రామ్ పోతినేని హీరోగా రూపొందిన చిత్రం రెడ్. ఈ సినిమాను స్రవంతి రవికిశోర్ నిర్మిస్తుండగా.. రామ్ తో వరుస సినిమాలు తీసిన కిషోర్ తిరుమల దర్శకత్వం వహించాడు. ఇప్పటికే లిరికల్ సాంగ్స్, ట్రైలర్ లతో అలరిస్తున్న ఈ సినిమా సంక్రాంతి కానుకగా థియేటర్లలో విడుదల కాబోతుంది. తమిళ సూపర్ హిట్ తడమ్ నుండి రీమేక్ చేసిన రెడ్ సినిమా గురించి డైరెక్టర్ కిషోర్ తిరుమల తాజాగా పలు విషయాలు ఓ ఇంటర్వ్యూలో షేర్ చేసుకున్నాడు. 'నిజానికి తడమ్ మూవీ నుండి రీమేక్ చేసినా ఎక్కడా ఆ ఫీలింగ్ రాకుండా చేసాం. తడమ్ నుండి కథ మాత్రమే తీసుకున్నా. ఒక కొత్త స్క్రిప్ట్ పై ఎలా వర్క్ చేస్తామో రెడ్ కి కూడా అలానే చేశా. ఒక కొత్త కాన్సెప్ట్ గుర్తుకు వచ్చినప్పుడు దాన్ని స్క్రిప్ట్ గా మలచడానికి అంతే హార్డ్ వర్క్ చేశాను. అందుకే రెడ్ సినిమా మీకు రీమేక్ సినిమాలా అనిపించదు. రెడ్ ఒక ఫ్రెష్ మూవీ. కేవలం తడమ్ లైన్ మాత్రమే తీసుకున్నాం. కథ - కథనం - స్క్రీన్ ప్లే - డైలాగులు అన్నీ కొత్తగా రాసాము'.

అంతేగాక.. 'ఇస్మార్ట్ శంకర్ సినిమాతో రామ్ కొత్త ఇమేజ్ సొంతం చేసుకున్నాడు. రామ్ ఇమేజ్ దృష్టిలో ఉంచుకొనే ఈ సినిమాలో రామ్ పాత్రలను డిజైన్ చేయలేదు. ఈ సినిమాలో రామ్ రఫ్ లుక్ నేను డిజైన్ చేసింది కాదు.. రామ్ సొంతంగా ట్రై చేసాడు బాగుందని నేను ఓకే చేశా.. ట్రావెలింగ్ లో భాగంగా షార్ట్ హెయిర్ - గడ్డంతో కనిపిస్తే అదే లుక్ కంటిన్యూ చేసాం. ఇంకా డ్యూయల్ రోల్స్ కోసం ఎలాంటి మార్పు చేయలేదు. అందుకే రెండు పాత్రలు రఫ్ గా చూపించాం' అంటూ కిషోర్ చెప్పుకొచ్చాడు. ఇక తన తదుపరి సినిమా శర్వానంద్ తో ఉంటుందని.. ఆ సినిమాకు 'ఆడాళ్ళు మీకు జోహార్లు' అనే టైటిల్ అనుకున్నట్లు తెలిపాడు. ఇక రెడ్ సినిమా సంక్రాంతికి అంటే జనవరి 14న థియేటర్లలో విడుదల అవుతోంది. చూడాలి మరి రామ్ రెడ్ ప్రతాపం ఎలా ఉండబోతుందో..!!