కిట్టుగాడికి అంత డిమాండా?

పోయినవారం టాలీవుడ్ బాక్సాఫీస్‌లో మూడు సినిమాలు పోటీ పడ్డాయి. అందులో వీకెండ్ తర్వాత రేసులో నిలిచింది ‘కిట్టు ఉన్నాడు జాగ్రత్త మాత్రమే’. గుంటూరోడు.. ద్వారక సినిమాలకు ఓపెనింగ్స్ పర్వాలేదు కానీ.. ఆ తర్వాత అవి నిలవలేకపోయాయి. ఈ రెండు సినిమాలకూ నష్టాలు తప్పేట్లు లేదు. ఐతే ‘కిట్టు ఉన్నాడు జాగ్రత్త’ మాత్రం ఓ మోస్తరు కలెక్షన్లతో సాగిపోతోంది. ఓపెనింగ్స్ విషయంలోనూ ఈ చిత్రమే పైచేయి సాధించింది. ఇప్పటిదాకా ఈ సినిమా రూ.7.5 కోట్ల దాకా షేర్ సాధించినట్లు ట్రేడ్ పండిట్లు చెబుతున్నారు. విశేషం ఏంటంటే ఈ చిత్రానికి శాటిలైట్ డీల్ కూడా ఊహించని రేంజిలో జరిగింది.

జెమిని టీవీ ‘కిట్టు ఉన్నాడు జాగ్రత్త’ శాటిలైట్ హక్కుల్ని రూ.3 కోట్లకు కొనుగోలు చేసినట్లు సమాచారం. రాజ్ తరుణ్ రేంజికి ఇది చాలా పెద్ద మొత్తమే. అతడి కెరీర్లో అత్యధిక శాటిలైట్ ధర పలికిన చిత్రమిదే. ‘దొంగాట’ ఫేమ్ వంశీకృష్ణ దర్శకత్వం వహించిన ‘కిట్టు ఉన్నాడు జాగ్రత్త’లో రాజ్ తరుణ్ సరసన అను ఇమ్మాన్యుయెల్ కథానాయికగా నటించింది. ఈ చిత్రానికి కామెడీ ప్రధాన ఆకర్షణగా నిలిచింది. ముఖ్యంగా రేచి పాత్రలో పృథ్వీ పండించిన హాస్యం హైలైట్ అయింది. ‘ఏకే ఎంటర్టైన్మెంట్స్’ బేనర్లో రాజ్ తరుణ్ కు ఇది వరుసగా రెండో హిట్టు కావడం విశేషం. ఆ బేనర్లో ఇంతకుముందు అతను చేసిన ‘ఈడోరకం ఆడోరకం’ కూడా మంచి విజయం సాధించింది.

Like Us on Facebook : https://www.facebook.com/Tupakidotcom/