కొడకా కూడా కాంట్రోవర్సిలోకి

ఏదో ఒక వివాదం తో సినిమా కంటే ఎక్కువగా ఇతర విషయాలతో హై లైట్ అవుతున్న అజ్ఞాతవాసిని మరో చిక్కు చుట్టుముట్టింది. మాచవరం పోలీస్ స్టేషన్ లో కోటేశ్వర్ రావు అనే లాయర్ ఈ పాట ఆ పేరు మీద ఉన్న వాళ్ళ మనోభావాలు దెబ్బ తీసేలా ఉందని పోలీస్ స్టేషన్ లో కంప్లయింట్ ఫైల్ చేయటంతో మీడియా హడావిడి అక్కడికి కూడా చేరి ఇది కాస్త వివాదంగా మారుతోంది. పది రోజుల క్రితమే విడుదలైన ఈ పాట గురించి ఇప్పుడు ఫిర్యాదు చేయటం విశేషం. దీని గురించిన పూర్తి వివరాలు ఇంకా బయటికి రాలేదు కాని సదరు పోలీస్ స్టేషన్ దగ్గర భారీ డ్రామా నెలకొంది. ఉదయం కత్తి మహేష్ మీద పేరడి పాట వివాదం ఇంకా చల్లరకుండానే కొత్తది మొదలు అయ్యింది.

ఇవాళ అర్ధరాత్రి నుంచి అజ్ఞాతవాసి చూసేందుకు ఫాన్స్ బారులు తీరుతున్నారు. చాలా చోట్ల సెక్యూరిటీ కారణాల వల్ల బెనిఫిట్ షోల రద్దు కాగా బిసి సెంటర్స్ లో మాత్రం యధావిధిగా కొనసాగేలా ఉంది. హైదరాబాద్ తో పాటు ఆంధ్ర ప్రదేశ్ లో సైతం కొన్ని కీలక నగరాలు, పట్టణాల్లో ప్రీమియర్లకు అనుమతులు ఇవ్వలేదని వార్తలు అందుతున్నాయి. దీని పట్ల పవన్ ఫాన్స్ అసంతృప్తి వ్యక్తం చేస్తున్నారు. కొన్ని చోట్ల అభిమాన సంఘాల సభ్యులు తమకు టికెట్లు ఇవ్వకుండా బ్లాక్ మార్కెట్ కు తరలించి అన్యాయం చేస్తున్నారని థియేటర్ల యజమానులపై పోలీస్ స్టేషన్ దాకా వెళ్లారు. ఈ నేపధ్యంలో కొడకా కోటేశ్వర్ రావా పాట గొడవ తోడయ్యింది కాని ప్రస్తుతానికి టికెట్ల వేటలో ఉన్న ఫాన్స్ దీన్ని పట్టించుకునే స్థితిలో లేరు. దర్శక నిర్మాతల స్పందన తెలియాల్సి ఉంది.