Kjo ఆవేద‌న‌.. న‌న్ను ఎక్కువగా తిడుతున్నారు కానీ..!

కాఫీ విత్ క‌ర‌ణ్ ఆరు సీజ‌న్లు పూర్త‌య్యాయి. ఏడో సీజ‌న్ ఓటీటీలో విజ‌య‌వంతంగా కొన‌సాగుతోంది. ఇప్ప‌టికే ప‌లువురు టాప్ స్టార్ల‌తో ఎపిసోడ్స్ ప్ర‌జ‌ల్ని అల‌రించాయి. అయితే కాఫీ విత్ క‌ర‌ణ్ షోని ద్వేషిస్తూ త‌న‌ను తిడుతున్నార‌ని క‌ర‌ణ్ ఆవేద‌న చెందాడు. అంతేకాదు వినోదాన్ని ద్వేషిస్తూనే గొప్ప‌గా ఆద‌రిస్తున్నార‌ని కూడా ఆనందం వ్య‌క్తం చేశాడు. ఎవ‌రైనా ప్ర‌జలు సుదీర్ఘంగా తిడుతూ వ్యాసం రాసారంటే వారి జీవితం నుంచి ఎంతో విలువైన స‌మ‌యాన్ని నాకోసం కేటాయించార‌ని అర్థం అంటూ రివ‌ర్స్ పంచ్ లు కూడా వేసాడు క‌రణ్‌. ఇంకా చెప్పాలంటే ఎవ‌రు ఎంత ఎక్కువ తిడితే అంత పెద్ద స‌క్సెస్ సాధించిన‌ట్టేన‌నేది కూడా అత‌డి ఉద్ధేశం.

మ‌మ్మ‌ల్ని ఎందుకు తిట్టినా కానీ షోని విప‌రీతంగా చూస్తున్నారనేది నిజం అని క‌ర‌ణ్ అన్నారు. డిస్నీ ప్ల‌స్ హాట్ స్టార్ లో కాఫీ విత్ కరణ్ సీజన్ 7 ప్రసారమ‌వుతోంది. ఇప్పటికే కియారా అద్వానీ - షాహిద్ కపూర్ లతో ఎనిమిది ఎపిసోడ్ లుగా అల‌రించింది. కొత్త సీజన్ అట్టహాసంగా ప్రారంభమై అంతే రంజుగా సాగింది. బాలీవుడ్ లోనే కాకుండా దక్షిణాది నుండి కూడా చాలా మంది A-లిస్ట‌ర్ స్టార్లు ఈ షోలో క‌నిపించారు. ఇటీవల షోపై అనవసరమైన ట్రోలింగ్ గురించి క‌ర‌ణ్ ఓపెన‌వుతూ... కొన్నిసార్లు ద్వేషాన్ని వినోదభరితంగా చూస్తాన‌ని కూడా అన్నాడు క‌ర‌ణ్‌.

షో విష‌యంలో నిజానికి ఎంత ద్వేషం ఉందో ఎలాంటి ట్రోలింగ్ సాగుతోందో నాకు తెలియదు. కానీ ఇలాంటి ఒక షో ఉనికిలో ఉందనేది అంద‌రికీ తెలిసింది. ప్ర‌జ‌ల‌ ద్వేషాన్ని ప‌రిశీలిస్తే.. కొన్నిసార్లు వినోదభరితంగా ఉంటుంది.. ఎందుకంటే వారు షోని ఎందుకు ఎక్కువగా తిట్టారు అన్న‌ది అటుంచితే షోని ఎక్కువ‌గా చూస్తున్నారు క‌దా? నేను ట్విట్టర్ స‌హా ఇతర పోర్టల్స్ లో థ్రెడ్ లను చదివాను.

KWK గురించి ప్రజలు ఉపన్యాసాలు ఇచ్చిన‌ రీల్స్ కి నేను చాలా కదిలిపోయాను. గుండెల్ని తాకినట్లు భావిస్తున్నాను. నేను దీనిని ఇష్టపడుతున్నాను.. మీరు చాలా అసహ్యించుకున్న దానిపై ఇంత సుదీర్ఘ కాలమ్ రాయడానికి మీరు మీ జీవితాల నుండి చాలా సమయం తీసుకున్నారనేది నిజం! అంటూ త‌న‌దైన శైలిలో చ‌తుర‌త‌తో సంభాషించాడు క‌ర‌ణ్‌.

``నేను నిజాయితీగా ఉంటాను.. నేను విద్వేషాన్ని సమర్థించను.. కానీ దాని గురించి మాట్లాడటానికి నాకు నేను రుణపడి ఉంటాను. ఇలాంటి విద్వేష చ‌ర్య విప‌రీత‌మైన‌ది! అని నాకు కొన్నిసార్లు అనిపిస్తుంది. అందుకే నేను దాని గురించి మాట్లాడకపోతే ఇప్పటికీ దాని వ‌ల్ల‌నే నేను బాధపడుతున్నానని ప్రజలు అనుకోవచ్చు`` అని అన్నాడు. ఒక ర‌కంగా త‌న‌ను త‌న షోని ద్వేషించేవాళ్ల‌ను అస్స‌లు ప‌ట్టించుకోన‌ని చెప్పే ప్ర‌య‌త్నం చేశాడు క‌ర‌ణ్‌.

కాఫీ విత్ కరణ్ 7 చివరి ఎపిసోడ్ ల‌లో విక్కీ కౌశల్ - సిద్ధార్థ్ మల్హోత్రా.. కియ‌రా - షాహిద్ కనిపించారు. కొత్త సీజన్ లో కృతి సనన్- టైగర్ ష్రాఫ్..... అనిల్ కపూర్- వరుణ్ ధావన్ అతిథులుగా కనిపించనున్నారు. గౌరీ ఖాన్- అమీర్ ఖాన్- మహీప్ కపూర్- భావన పాండే కూడా త‌దుప‌రి ఎపిసోడ్స్ లో కనిపించనున్నారు.