50 అడుగుల ఎత్తు నుంచి దూకుతున్నాడు.. ఈసారైనా హిట్ కొడతాడా..?

కోలీవుడ్ హీరో విశాల్ 'పందెంకోడి' 'పొగరు' 'పల్నాడు' 'వాడు వీడు' 'రాయుడు' 'పూజ' 'అభిమన్యుడు' 'డిటెక్టివ్' వంటి సినిమాలతో టాలీవుడ్ లో కూడా మంచి మార్కెట్ క్రియేట్ చేసుకున్నాడు. అయితే ఈ మధ్య విశాల్ ప్ర‌భ తెలుగులో త‌గ్గిపోయింది. విశాల్ నటించిన గ‌త మూడు సినిమాలు ఆశించిన స్థాయిలో విజయం సాధించలేకపోయాయి. ఇటీవల ఎన్నో అంచనాలతో వచ్చిన 'చక్ర' సినిమా పరిస్థితి కూడా అలానే అయింది. ఈ నేపథ్యంలో మరో రెండు కొత్త సినిమాలతో వస్తున్నాడు విశాల్.

'డిటెక్టివ్' చిత్రానికి సీక్వెల్ గా విశాల్ ''డిటెక్టివ్ 2'' అనే సినిమా తెరకెక్కిస్తున్నాడు. దీంతో పాటు ‘నోటా’ ఫేమ్ ఆనంద్‌ శంకర్‌ దర్శకత్వంలో ''ఎనిమీ'' అనే మూవీలో నటిస్తున్నాడు. ఆర్య విలన్ గా నటిస్తున్న ఈ చిత్రంలో మృణాలిని రవి హీరోయిన్ గా నటిస్తోంది. ప్రస్తుతం ఈ యాక్షన్ ఎంటర్టైనర్ షూటింగ్ దుబాయ్ లో జరుగుతోంది. అయితే ఈ సినిమాలో ఓ యాక్షన్ సీన్ కోసం విశాల్ ఏకంగా 50 అడుగులు ఉన్న బిల్డింగ్ పై నుంచి ఎలాంటి స‌పోర్ట్ సిస్టిమ్ లేకుండా కింద ఉన్న స్పాంజ్ బెడ్ మీద‌కి దూకిన‌ట్లుగా తెలుస్తోంది. ప్రస్తుతం దీనికి సంబంధించిన ఫోటోలు సోషల్ మీడియాలో వైరల్ అవుతున్నాయి. ఇంత హై వోల్టేజ్ రిస్కులు చేస్తున్న విశాల్.. ఈసారైనా ఆడియెన్స్ అటెన్ష‌న్ సంపాదించి సూపర్ హిట్ కొడతాడేమో చూడాలి.