'విరాటపర్వం'లో వెన్నెల ప్రేమ కథనం.. 'కోలు కోలమ్మా కోలో' వీడియో సాంగ్..!

దగ్గుబాటి రానా - సాయిపల్లవి జంటగా నటిస్తున్న తాజా చిత్రం ''విరాటపర్వం''. 'రివ‌ల్యూష‌న్ ఈజ్ యాక్ట్ ఆఫ్ ల‌వ్' అనేది ఉపశీర్షిక. వేణు ఊడుగుల ద‌ర్శ‌క‌త్వం వహిస్తున్న ఈ చిత్రాన్ని డి.సురేష్ బాబు సమర్పణలో ఎస్‌.ఎల్‌.వి సినిమాస్ బ్యానర్ పై సుధాకర్ చెరుకూరి నిర్మిస్తున్నారు. 1990 కాలం నాటి నక్సలైట్ బ్యాక్ డ్రాప్ లో తెరకెక్కుతున్న ఈ చిత్రంలో కామ్రేడ్ రవిన్న పాత్రలో రానా కనిపించనున్నాడు. ప్ర‌స్తుతం పోస్ట్ ప్రొడ‌క్ష‌న్ వ‌ర్క్స్ జరుపుకుంటున్న ఈ చిత్రాన్ని ఏప్రిల్ 30న విడుద‌ల చేయనున్నారు. ఇప్పటికే ఫస్ట్ లుక్ - టీజర్‌ లతో సినిమాపై అంచనాలు పెంచిన చిత్ర యూనిట్.. తాజాగా ఈ చిత్రంలోని ఫస్ట్ సింగిల్ ని విడుదల చేశారు.

విక్టరీ వెంకటేష్‌ 'కోలు కోలు కోలమ్మ కోలు` అంటూ సాగే ఈ పాటని విడుదల చేసి.. ఇప్పటికే తన మైండ్‌ లో ఈ పాట స్ట్రక్‌ అయిపోయిందని పేర్కొన్నాడు. ''స్త్రీ ప్రేమ, అనంతమైన కథనాలను నిశ్శబ్దంగానే ప్రపంచానికి అందిస్తుంది. ఈ రోజు 'కోలు కోలు' పాట ద్వారా వెన్నెల ప్రేమ కథనం'' అని దర్శకుడు పేర్కొన్నాడు. ఇక పాట విషయానికొస్తే 'కోలు కోలోయమ్మా.. కొమ్మా చివర పూలు పూసే కోలో..' అంటూ ఆద్యంతం జానపద పాట తరహాలో సాగింది. ''కోలు కోలమ్మా కోలో.. కోలో నా సామి.. మనసే మేలుకొని చూసే.. కలలో నిండిన వాడే కనుల ముందుర ఉంటే నూరేళ్లు నిదుర రాదులే" అంటూ వెన్నెల పాత్రలో నటిస్తున్న సాయిపల్లవి పాడుకుంటోంది.

సురేష్‌ బొబ్బిలి పాటకు స్వరాలు సమకూర్చారు. ప్రముఖ లిరిసిస్ట్ చంద్రబోస్ ఈ పాటకు సాహిత్యాన్ని అందించగా.. సింగర్ దివ్య మాలిక - సురేష్ బొబ్బిలి కలసి ఆలపించారు. వినసొంపుగా ఉండే ఈ పాటను సాయి పల్లవి మీద అందమైన లొకేషన్లతో ఆద్యంతం ఆకట్టుకునేలా చిత్రీకరించారు. పల్లెటూరి అమ్మాయిగా సాయి పల్లవి వేసిన క్యూట్ స్టెప్స్ అలరిస్తున్నాయి. అడవి, పల్లెలు, ప్రకృతి రమణీయతకు అద్దం పట్టేలా ఈ పాట ఉంది. 'విరాటపర్వం' చిత్రానికి డానీ సాంచెజ్‌ లోపెజ్ - దివాకర్ మణి సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేస్తున్నారు.