కోన కామెంట్స్ ఎవరి గురించి?

టాలీవుడ్ లో కొంతమంది ఫ్యాన్స్ ఉంటారు. తమ అభిమాన హీరో అంటే ప్రాణం పెట్టేస్తారు. వాళ్లను ఎవరైనా పల్లెత్తు మాటన్నా సహించరు. సినిమా హిట్టు.. ఫ్లాపులతో సంబంధం లేకుండా సదా తమ అభిమాన హీరోకు జైకొట్టేస్తుంటారు. ఈ తరహా ఫ్యాన్ బేస్ మిగిలిన హీరోల కంటే పవన్ కళ్యాణ్ కు చాలా చాలా ఎక్కువ. అందుకే పవన్ గురించి పాజిటివ్ గా మాట్లాడినా.. నెగిటివ్ గా మాట్లాడినా రెస్పాన్స్ చాలా హెవీగానే ఉంటుంది.

పవన్ రాజకీయ రంగప్రవేశం చేసి జనసేన పార్టీ పెట్టి.. ఇప్పుడు దాని కార్యకలాపాలు విస్తృతం చేస్తున్నాడు. ఈ టైంలో అతడిపై విమర్శల డోస్ పెరుగుతోంది. ఇదే టైంలో పవన్ మీద వస్తున్న విమర్శలను తిప్పికొట్టడంలో కానీ.. మద్దతుగా నిలవడంలోగానీ ఫ్యాన్స్ తప్ప ఇండస్ట్రీ నుంచి ఎవరూ బహిరంగంగా ముందుకు రాలేదు. తాజాగా రైటర్ కోన వెంకట్ పవన్ కు మద్దతుగా సోషల్ మీడియాలో నోరు విప్పాడు. ‘‘కొంతమంది జోకర్లు పవన్ కళ్యాణ్ మౌనాన్ని అలుసుగా తీసుకుంటున్నారు. అలా ఎంతమాత్రమూ భావించవద్దు’’ అంటూ ఓ ట్వీట్ పెట్టాడు. కోన ఈ కామెంట్లు ఎవరిని ఉద్దేశించి అన్నది డైరెక్ట్ గా చెప్పకపోయినా తగలాల్సిన వాళ్లకు తగిలాయలని అభిమానులు ఆనంద పడిపోతున్నారు.

పవన్ కళ్యాణ్ లేటెస్ట్ సినిమా అజ్ఞాతవాసి రిలీజ్ కు సిద్ధంగా ఉంది. సినిమాకు సంబంధించి విశేషాలన్నీ ఒక్కొక్కటిగా బయటకు వస్తుండటంతో అభిమానుల్లో ఉత్సాహం రెట్టింపవుతోంది. ఇలాంటి టైంలో ఇండస్ట్రీ నుంచి పవన్ కు సపోర్ట్ ఇస్తూ మాట్లాడటం వారి ఆనందాన్ని మరింత పెంచుతోంది. కోన కామెంట్ కు మద్దతుగా వందల్లో రిప్లయ్ లు ఇవ్వడంతో పాటు రీట్వీట్లు పెడుతూ తమ ఆనందాన్ని షేర్ చేసుకుంటున్నారు.