శ్రీను వైట్ల.. పండగ చేస్కో సాంగ్

ఎంత ఎదిగినా ఒదిగి ఉండమని పెద్దోళ్లు ఊరికే అంటారా? ఎంత సక్సెస్ లో ఉంటే మాత్రం మిడిసిపాటు పనికి రాదు. అందులోనూ సినీ పరిశ్రమలో ఈ మిడిసిపాటు అన్నది చాలా ప్రమాదకరం. ఇక్కడ పొగరు చూపించినా.. వేరే వాళ్లను చులకనగా మాట్లాడినా చాలా కష్టం. ఎందుకంటే సక్సెస్ ఎల్లప్పుడూ నిలిచి ఉండదు. ఒక్క ఫెయిల్యూర్ వచ్చిందంటే చాలు.. ఎంత పైన ఉన్న వాళ్లయినా కింద పడాల్సిందే. ఈ సంగతి గ్రహించక కోన వెంకట్ హద్దులు దాటిపోయాడు. అసలే శ్రీను వైట్ల చచ్చిన పాములా ఉంటే.. అతణ్ని తన మాటలతో మరింతగా చంపాలని చూశాడు.

‘బ్రూస్ లీ’ సినిమాకు తాను అద్భుతమైన సన్నివేశాలు రాశానని.. వైట్ల వాటిని తీసుకోకపోవడం వల్లే సినిమా ఫ్లాప్ అయిందని చెబుతూ తన పాత మిత్రుడి మీద విమర్శలు గుప్పించాడు కోన. వైట్ల గురించి ఇంకా చాలా చాలా మాటలే అన్నాడు. కానీ అతను మాత్రం సైలెంటుగా ఉన్నాడు. మరోవైపు ‘అఖిల్’ సినిమా ఫెయిల్యూర్ విషయంలోనూ తనకు బాధ్యత లేదని.. దానికి స్క్రీన్ ప్లే తాను కాదని, మాటలు మాత్రమే అందించానని అంటూ తప్పించుకునే ప్రయత్నం చేశాడు కోన.

కానీ ఇప్పుడు కోన కథ, మాటలు, స్క్రీన్ ప్లే అందించడంతో పాటు దర్శకత్వ పర్యవేక్షణ కూడా చేసిన ‘శంకరాభరణం’ ప్రేక్షకుల ముందుకొచ్చింది. టాక్ చాలా వరకు నెగెటివ్ గానే ఉంది. ఇక్కడ నెపం వేరే వాళ్ల మీద నెట్టేయడానికి అవకాశమే లేదు. కాబట్టి రిజల్ట్ ఎలా వచ్చినా తీసుకోవాల్సిందే కోనానే. మరి సినిమాకు వస్తున్న నెగెటివ్ టాక్ గురించి కోన ఏమంటాడో చూడాలి. అతడి రెస్పాన్స్ ఎలా ఉంటుందో కానీ.. శ్రీను వైట్ల మాత్రం కోన వెంకట్ మాటలు రాసిన ‘పండగ చేస్కో’ టైటిల్ సాంగ్ పెట్టుకుని ఎంజాయ్ చేస్తుంటాడేమో.